Kampionët e shumtë te Napoli e kanë uruar mbrojtësin Elseid Hysaj për suksesin e arritur me kombëtaren e Shqipërisë. 22-vjeçari ka folur për suksesin kuqezi por edhe për sezonin e parë te Napoli në Radio Goal, transmetim i Radio Kiss Kiss Napoli. “Kualifikimi i Shqipërisë është diçka e mrekullueshme, që nuk ka ndodhur më parë. Kjo do të thotë shumë për futbollin tonë. Reina, Higuain e të tjerët më pritën e më uruan për këtë arritje”. Në kualifikueset e ardhshme, për botërorin rus, Shqipëria do të ndeshet me Italinë, ku, midis të tjerëve, luan edhe Insigne i Napolit. “Do të jetë një duel i vështirë me të, megjithatë më duket argëtuese ta kem si kundërshtar”, thotë Hysaj. Mbrojtësi i ri flet edhe për përvojën te Napoli. “Po punojmë mirë. Tani mendojmë për ndeshjen me Fiorentinën, që do të jetë mjaft e vështirë. Titulli nuk është i pamundur, siç ëndërroja unë europianin me kombëtaren, mund ta ëndërrojmë edhe titullin me Napolin, por duke i marrë ndeshjet me radhë”.
Titulli me Napolin, mrekullia e dytë e Hysajt
