Pas shumë përpjekjesh ka nisur ndërtimi i Xhamisë së Namazgjasë në Tiranë, faltores e cila i ka munguar besimtarëve muslimanë të Shqipërisë prej vitesh. Ndërtimi i kësaj faltoreje do të kryhet me ndihmën financiare dhe teknike të Republikës së Turqisë.
Ambasadori i Turqisë në Tiranë, Hidayet Bayraktar ka dhënë një deklaratë të shkurtër për Anadolu Agency në lidhje më këtë objekt kulti që do t’iu shërbejë besimtarëve muslimanë të kryeqytetit shqiptar. Bayraktar tha se është shumë i gëzuar që bëhet dëshmitar i nisjes së punimeve për ndërtimin e “xhamisë më të madhe në Ballkan”, siç e quajti ai. Bayraktar tha se Presidenti i Republikës së Turqisë, Recep Tayyip Erdoğan ndjek nga afër këto punime personalisht dhe si President i vendit edhe ai është një nga ndihmuesit më të mëdhenj në realizimin e ndërtimit të saj.
“Shqipëria është një vend me 70 % muslimanë ku besimet fetare veprojnë në liri dhe bashkëjetesa fetare gjithashtu është e theksuar”, tha Bayraktar në fjalën e tij, duke shtuar se: “Megjithëse Shqipëria është një vend i cili tregohet me gisht për bashkëjetesën fetare, muslimanët të cilët janë në shumicë prej kohësh nuk ushtrojnë dot të drejtën e tyre për të kryer ritet fetare pasi faltoret në këtë vend janë të pamjaftueshme. Ndërkohë vëllezërit tanë shqiptarë që i përkasin besimit katolik dhe ortodoks edhe pse më të pakët në numër kanë një sasi të mjaftueshme vendesh për të kryer ritet e tyre fetare. Ndërkohë muslimanët gjatë muajit të Ramazanit dhe gjatë faljes së namazit të xhumasë kanë vështirësi në gjetjen e një ambienti të përshtatshëm. Siç e dimë gjatë festave të Bajrameve ata falën në bulevard për shkak të mungesës së një xhamie të mjaftueshme për të kryer këtë rit. Nëse në vitin 1930 kur popullsia e qytetit të Tiranës ishte shumë herë më e vogël, numri i xhamive në këtë qytet shkonte deri në 40, ndërsa sot kur popullsia e këtij qyteti arrin gati një milion gjenden vetëm 8 xhami”. tha ai
Bayraktar në përfundim të fjalës së tij tha se në këtë xhami do të mund të falen rreth 5 mijë persona në të njëjtën kohë dhe se ndërtimi i një muzeu të bashkëjetesës pranë kësaj xhamie do ta bëjë atë që të japë një mesazh të fortë për vendet e tjera të Ballkanit dhe botës.
Ndërkohë përfaqësuesi ligjori firmës Komash A.SH Tahsin Koç, dha detaje mbi periudhën përgatitore që çoi deri në fillimin e punimeve për ndërtimin e kësaj xhamie. Duke vënë në dukje se prej 3 muajsh ai dhe ekipi i tij kanë ndjekur një sërë procedurash ligjore për fillimin e punimeve, thekson se kjo xhami do të jetë një dhuratë e popullit turk për popullin shqiptar.
Edhe shefi dhe menaxheri i kantierit të ndërtimit të xhamisë, Hüseyin Şentürk. Şentürk dha detaje mbi ndërtimin e kësaj vepre të rëndësishme për qytetin e Tiranës.
“Në fazën e parë të projektit e cila mund të zgjasë rreth 6 muaj pritet të bëhen gërmime dhe ndërtime të bazës së themeleve të xhamisë” tha Şentürk dhe shtoi më tej se hapësira e fushës së ndërtimit të kësaj xhamie është rreth 10 mijë metra katrorë dhe se 3250 prej tyre janë pjesë fizike të ndërtimit. “Xhamia do të ketë tre kate bodrum, ku 2 prej tyre do të përdoren si parking, ndërsa tjetra për hapësira zyrash dhe bibliotekë. Pranë xhamisë do të ndërtohet edhe një muze i cili quhet ndryshe edhe si ‘Muzeu i Bashkëjetesës’, shtoi Şentürk në përfundim të fjalës së tij.
Xhamia do të ketë 4 minare dhe pranë sajëpritet të ndërtohet edhe një muze i cili është emërtuar si “Muzeu i Bashkëjetesës” ku në të pritet të ekspozohen vlera në shërbim të bashkëjetesës ndërfetare.
Marrë nga Anadolu Agency
Redaksia Online
(Javanews.al)
