Brenda pak javësh, Kopshti nr. 20 në Tiranë do të marrë një pamje krejt të re. Bashkia e Tiranës ka nisur rikonstruksionin e plotë të godinës. Kryetari i Bashkisë së Tiranës Erion Veliaj, tha se Kopshti nr. 20 është njëri nga 23 kopshtet që po i nënshtrohen rikonstruksionit.
“Ky është viti i parë që Bashkia e Tiranës ka marrë në administrim, jo vetëm asetet, por edhe burimet njerëzore në kopshte. Duam që siç stafi ynë shërben me të njëjtën cilësi dhe pasion, po ashtu edhe ndërtesat të dhurojnë të njëjtat kushte cilësore për fëmijët, sepse qytetarët e Tiranës na kanë besuar gjënë e tyre më të shtrenjtë”, tha Veliaj.
Përveç këtij kopshti, kreu i bashkisë bëri të ditur se do të ndërhyhet edhe në godinat e kopshteve të tjera të njësisë administrative nr. 3.
“Jemi duke punuar që 6 kopshtet e kësaj njësie të jenë në gjendje perfekte për vitin e ri shkollor, në shtator. Teksa ne nxitojmë për të mbaruar punimet dhe sigurohemi që historitë me lagështirë dhe me kopshte që presin që nga viti ’83 të rikontruktohen, të mos kemi më në qytetin e Tiranës. Është pjesë e filozofisë tonë, ne jemi fokusuar tek fëmijët”, u shpreh kryetari i Bashkisë, Erion Veliaj.
