Tre persona nga Tirana kanë rënë në pranga pasi nga Seksioni për Narkotikët në policinë e Tiranës është bërë e mundur kapja e tyre në flagrancë me 4 doza canabis sativa pranë shkollës së mesme “Asim Vokshi”.
Në bashkëpunim me Komisariatin e Policisë Nr. 1, është bërë i mundur arrestimi në flagrancë i shtetasve: Osman Mcini, 30 vjeç, Adriano Bajrami, 22 vjeç si dhe shtetasit me iniciale N. B., 16 vjeç, të tre banues në Tiranë.
“Kapja dhe arrestimi i këtyre shtetasve u bë i mundur falë punës së Seksionit të narkotikëve në Drejtorinë Vendore të Policisë Tiranë, të cilët kanë arritur t’i dokumentojnë veprimtarinë kriminale në shitjen e lëndëve të dyshuara narkotike e llojt “Cannabis Sattiva”, ku këta shtetas në bashkëpunim me njëri – tjetrin shisnin lëndën narkotike në ambiente përreth shkollave të ndryshme.
Personat e lartpërmendur janë kapur në flagrancë në shkollën e mesme të gjuhëve të huaja “Asim Vokshi”, ku gjatë kontrollit fizik këtyre shtetasve u janë gjetur 4 doza lëndë e dyshuar narkotike e llojit “Cannabis Sattiva” dhe gjatë kontrollit të banesës së shtetasit Osman Mcini janë gjetur 8 doza lëndë e dyshuar narkotike e llojt “Cannabis Sattiva”, -thuhet në njoftimin zyrtar të policisë, teksa shtohet se materialet proceduriale ju kaluan Prokurorisë së rrethit Gjyqësor Tiranë, për veprën penale “Prodhim dhe shitej të narkotikëve në bashkëpunim”, parashikuar nga Neni 283/2 i Kodit Penal.
