Pak orë pas dhunimit, dhe më pas marrjes peng të 37-vjeçarit Klajdi Gjeçi, Policia e Tiranës bëri të mundur arrestimin e 2 personave dhe shpalljen në kërkim të një tjetri për këtë ngjarje. Njëri prej autorëve u arrestua në një mjet taksi së bashku me të dëmtuarin pas mesnate, ndërkohë shtetasi tjetër u prangos gjatë orëve të para të mëngjesit. Aktualisht blutë po punojnë për kapjen e një tjetër pesoni të përfshirë në ngjarje.
Ngjarja ka ndodhur pas një konflikti të çastit. Sipas dëshmisë të Klejdi Yzeirajt, i cili është edhe pronar një lokali në zonën e “Freskut” në Tiranë, konflikti me Gjeçin nuk ishte për shkak të gërvishtjes së automjeteve apo parakalimit. Gjeçi kishte qenë ditën e djeshme në lokalin e Yzeirajt për të ngrënë. Aty ai është konfliktuar me një kamerier dhe me vetë Yzeirajn.
Sipas të dhënave personi i dhunuar dhe më pas marrë peng, rezulton me precedentë të mëparshëm penal.
Ja njoftimi i Policisë së Tiranës
Më 26.12.2015, në orët e para të mëngjesit, u bë arrestmi në flagrancë e shtetaseve:
1- Klejdi Yzeiraj, 27 vjeç, banues në Tiranë
2 – Martin Seferi, 31 vjeç, banues në Tiranë
Gjithashtu u bë shpallja në kërkim policor i shtetasit E. Y, 31 vjeç, banues në Tiranë
Këta shtetas më datë 25.12.2015, rreth orës 20.35, në rrugën e ‘‘Dibrës“, në bashkëpunim me njeri –tjetrin, pas një konflikti të çastit për motive dobeta, kanë rrahur dhe më pas kanë marrë me forcë nga mjeti i tij, tip “Peugeot”, me targa AA 588 FP, shtetasin K. Gj, 37 vjeç, banues në Tiranë, të cilin pasi e kanë hipur në automjetin e tyre, tip “BMV X-6”, e kanë dhunuar atë fizikisht dhe pas janë kapur nga Policia.