Të gjithë ata individë që zaptojnë hapësirat publike do të përballen me një sërë masash ndëshkimore. Paralelisht me aksionin për lirimin e hapësirave publike në Njësinë Administrative nr. 5, Bashkia e Tiranës ka nisur hartimin e një plani masash për parandalimin e situatave të tilla, në të cilin parashikohen edhe ndëshkime me gjoba ndaj atyre që i zënë ato në mënyrë të paligjshme.
Gjatë inspektimit të punimeve për rehabilitimin e njësisë nr. 5, nënkryetari i Bashkisë së Tiranës, Isuf Shehu, tha në një prononcim për mediat, se do të merren të gjitha masat për të çliruar qytetin nga abuzimet. “Në ditën e pestë të aksionit për lirimin e hapësirave në Njësinë nr. 5, Bashkia e Tiranës po bën rehabilitimin e tyre. Pas lirimit të hapësirave ka nisur projekti për rikualifikimin e këtij blloku urban, për të shënuar fillimin e punimeve në këtë zonë dhe për rehabilitimin e ambienteve”, deklaroi Shehu.
Krahas punës për rikualifikimin e hapësirave publike, nënkryetari i Bashkisë së Tiranës tha se po merren masat e duhura, të cilat do të sanksionojnë vendosjen e penaliteteve për të gjithë ata të cilët zënë hapësirat publike. “Këto masa do të jenë tejet të ashpra. Në këtë mënyrë do të mundohemi ta çlirojmë qytetin nga të gjitha veprimet abuzive, për ta bërë sa më të banueshëm e të jetueshëm për të gjithë ne”, tha Shehu. Për sa i përket interesimit të mediave nëse ka pasur masa deri më tani, ai theksoi se Policia Bashkiake ka vendosur gjoba ndaj gjithë subjekteve të cilët kanë shkelur hapësirat publike.
Deklarata e nënkryetarit të Bashkisë së Tiranës u bë gjatë inspektimit të punimeve të projektit për ”Rikualifikimin Urban të Bllokut që kufizohet nga rrugët “Sulejman Delvina”, “Medar Shtylla”, “Skënder Luarasi”, “Grigor Heba dhe “Gjik Kuqali”. Ky projekt financohet nga Bashkia e Tiranës me një vlerë prej 62.2 milionë lekësh dhe do të mbarojë brenda 8 muajve.
