Policia në Tiranë ka vënë në pranga një 67-vjeçar i cili akuzohet se i ka gjuajtur me telefon në shpinë një gazetareje, ndërkohë që ajo ishte në krye të detyrës.
Gazetarja me inicialet D. B., ka kallëzuar në polici se është penguar gjatë realizimit të detyrës së saj, dhe është goditur me telefon në shpinë nga personi me inicialet F. M., ndërkohë kameramani me inicialet E.E që e shoqëronte gazetaren, është penguar gjithashtu në kryerjen e punës së tij, nga dy roje private. Këta të fundit i kanë dëmtuar pjesërisht kamerën gjatë filmimit.
“Specialistët për Hetimin e Krimeve të Komisariatit të Policisë Nr. 3 arrestuan shtetasin F. M., 67 vjeç, si dhe referuan materialet në Prokurori, ku nisi procedimi penal për shtetasit Q. L., 64 vjeç dhe H. B., 52 vjeç. Pasi ditën e djeshme, ka kallëzuar shtetasja D. B., gazetare, se është penguar gjatë kryerjes së detyrës dhe është goditur me telefon në shpinë nga shtetasi F. M.
Ndërkohë, shtetasi E. E., kameramani që shoqëronte kallëzuesen, është penguar në kryerjen e detyrës, duke iu dëmtuar pjesërisht kamera gjatë filmimit nga rojet private shtetasit Q. L. dhe H. B.”, thuhet në njoftimin e Policisë.
Policia vijon hetimet për zbardhjen e plotë të ngjarjes, ndërsa ky nuk është rasti i parë i dhunës ndaj gazetarëve gjatë kryerjes së detyrës.
