“Tiranë-Elbasan”, arrestimet për rrugët, për çfarë po hetohet ish-ministri i LSI

Deputeti i LSI-së ka qenë ministër Transportesh në kohën kur janë bërë shkeljet. Burime brenda organit të akuzës thonë për “Panoramën” se momentalisht po verifikohet roli i ish-ministrit, pasi në atë periudhë është bërë edhe një raport auditimi i KLSH-së, që gjeti shkelje në zbatimin e projektit.

Po kështu, rezulton se raporti i Kontrollit të Lartë të Shtetit është bërë që në vitin 2016, përpara se ministri Gjiknuri të çonte në Prokurori dosjen për tre ish-zyrtarët e rrugëve, Dashamir Xhika, Aksel Qurduka dhe Albens Alite. Konkretisht, bëhet fjalë për një auditim të KLSH-së ndaj Autoritetit Rrugor Shqiptar për projektin “Ndërtimi i Rrugës Tiranë-Elbasan”, për periudhën kohore 30.06.2015- 30.06.2016.

Hapësira kohore përkon me kohën kur Haxhinasto ka qenë ministër i Transporteve. Mirëpo, Haxhinasto dha dorëheqjen nga posti që mbante më 2 shtator të vitit 2016, vetëm 5 ditë përpara se KLSH-ja të bënte kallëzim në Prokurori për shkeljet e vërejtura në audit. Haxhinasto u zëvendësua më pas nga Sokol Dervishaj, edhe ky i ardhur nga radhët e LSIsë.

Ajo që bie në sy tjetër është se, KLSH-ja kallëzoi në Prokurori si drejtues të menaxhimit të projektit të rrugës, Aksel Qurdukun, i cili është arrestuar vetëm dy ditë më parë nga Policia me urdhër të Prokurorisë së Krimeve të Rënda. Mbetet ende e paqartë se përse Qurduku nuk është proceduar gjatë gjithë kësaj periudhe me shkeljet e konstatuara nga KLSH-ja në raportin e vitit 2016.

Në këtë raport, dëmi nga abuzimet me zbatimin e projektit është vlerësuar deri në 6.4 milionë dollarë vetëm në atë periudhë kohore të dhënë. Në përfundim, KLSHja konstaton se përgjegjësia për shkeljet binte mbi Aksel Qurdukën. Ish-ministri Haxhinasto është filmuar dy ditë më parë në Gjykatën e Elbasanit, ku po zhvillohet gjyqi tjetër ndaj dy ish-krerëve të ARRSH-së për shkeljet në segmentin rrugor ElbasanGjinar. Dashamir Xhika po hetohet edhe nga Gjykata e Krimeve të Rënda, së bashku me dy ish-drejtuesit e menaxhimit të projektit “Tiranë-Elbasan”, Aksel Qurduku dhe Albens Alite.

Këta të dy u arrestuan vetëm dy ditë më parë nga Policia me urdhër të Prokurorisë së Krimeve të Rënda. Hetimet kanë nisur pas një raporti tjetër, të bërë në dhjetor të vitit 2017 nga Ministria e Energjetikës dhe Infrastrukturës. Përveç dëmit prej rreth 54 milionë dollarë, auditi i ministrisë konstatoi edhe një shkelje të disiplinës financiare, me vlerë rreth 16 milionë dollarë.

Ky dëm, sipas auditit, është shkaktuar nga nënshkrimi i amendamenteve të kontratës pa burime financimi. Po kështu, raporti i dërguar në Prokurorinë e Krimeve të Rënda, shkruan se 25,220,016 dollarë dëme janë shkaktuar nga mosargumentimi i vonesave për zgjedhje teknike financiere të çështjeve të dala, moszbatimi i detyrimeve të lëna nga Këshilli Teknik për kontraktonin e rrugës, duke i lënë hapësirë këtij të fundit për pretendime në zbatimin e projektit për segmentin nr. 1, duke mos përfshirë asistencën e Avokaturës së Shtetit në këtë çështje dhe 11,665,552 dollarë dëme janë shkaktuar në të njëjtën mënyrë si më lartë, por kësaj here për një segment tjetër të rrugës, atë nr. 3.

Raporti thotë se 10,816,007 dollarë dëme janë shkaktuar nga pagesat e dyfishta për punë të përfunduara më parë si edhe të shlyera para nënshkrimit të amendimit. Bëhet fjalë për para të hedhura edhe një herë, që s’dihet se ku kanë përfunduar, për një punë që është kryer sipas një kontrate te vitit 2016. PANORAMA

ma.me