Megjithëse ishte përdhunuar nga dy persona, një vajzë 19-vjeçare është detyruar të japë dëshmi të rreme para gjykatës së Tiranës, duke pohuar se nuk është abuzuar seksualisht nga dy të arrestuarit. Krenar Shabani dhe Emiljan Kipti, mësohet të kenë kërcënuar adoleshenten duke i pohuar që të paraqitej në gjykatë dhe të deklaronte se nuk i kishin bërë gjë. Në rast të kundërt ata do e vrisnin sapo të dilnin nga burgu.
Nisur nga këto kërcënime, Vilma J. në datën 9 nëntor 2016 në 12.00 është pyetur para Gjykatës së Rrethit Gjyqësor Tiranë. Teksa pyetej nga prokurori i çështjes, Vilma ka bërë dëshmi të rreme para gjykatës, pasi është kërcënuar nga ana e shtetasve Krenar Shabani dhe Emiljan Kipti, të cilët e kanë marrë në telefon dhe i kanë thënë “…hajde në gjyq, se duhet të thuash që ato që ke kallëzuar nuk janë të vërteta, se ne nuk kemi bërë gjë, ndryshe do të vrasim ty kur të dalim nga burgu…”.
Ky ka qenë dhe shkaku që shtetasja Vilma J. ka ndryshuar thëniet para gjykatës dhe ka bërë dëshmi të rreme. Për këtë veprim, pak ditë më parë gjykata e Tiranës e ka dënuar Vilma J. me 600 mijë lekë të vjetra. Vetë e pandehura e ka pranuar faktin që ka bërë dëshmi të rreme para gjykatës ku ka treguar edhe shkaqet,kërcënimin e të pandehurve Krenar Shabani dhe Emiljan Kipti nga burgu.
