Tre persona të maskuar e të armatosur kanë grabitur një pikë karburanti në Krujë, në rrugën nacionale Krujë-Krastë. Ngjarja ka ndodhur në orën 1:00 dhe grabitësit janë larguar me 10 mijë lekë të reja. Policia ka arritur të identifikojë makinën e përdorur dhe tani po punon për identifikimin e grabitësve.
Njoftimi i policisë së Krujës
Më datë 31.10.2016, rreth orës 01:10, në rrugën nacionale Krujë-Krastë, tre persona të maskuar dhe me armë kanë kërcënuar punonjësit e një karburanti ku i kanë marrë lekët e xhiros, rreth 10 000 lekë.
Autorët janë larguar më një mjet tip Audi A 3, ngjyrë gri e errët, me targa AA 771 JG. Me të marrë njoftim menjëherë në vendngjarje kanë shkuar Efektivat e Policisë, të cilët po punojnë për identifikimin e autorëve dhe zbardhjen e plotë të ngjarje.
Grabitja në Tiranë
Grabitja në Krujë është e dyta që raportohet, pasi dy orë pas saj u grabit edhe një pikë tjetër karburanti, në Qafë Kashar, nga dy persona të armatosur e me maska. Këtu dëmi ishte më i madh, pasi grabitësit kanë marrë 1 milionë lekë të rinj.
Njoftimi i policisë së Tiranës
Më datë 31.10.2016, rreth orës 03:12, në Autostradën Tiranë – Durrës, tek mbikalimi i Rinasit, dy persona (me çorape në kokë), janë afruar tek një karburant, me një automjet, ku njëri nga dy personat dyshohet të ketë pasur armë zjarri. Punonjësi i karburanti sapo ka parë dy personat të zbresin nga mjeti është larguar me vrap.
Duke përdorur mjete të forta kanë arritur të marrin Kasafortën e kësaj pike karburanti, ku në bazë të dëshmive në brendësi të saj ka patur xhiron e dy ditëve, shumë rreth 1.000.000 lekë. Nga hetimet paraprake dyshohet se janë larguar në drejtim të Durrësit. Punohet për identifikimin dhe kapjen e autorëve të kësaj vepre kriminale.
BW/d.i.
