Menka ka dy vajza, Paolën dhe Joanën.
I do të dyja shumë, por Joana, e cila nuk komunikon shumë me të, i ka mbetur pikë e dobët. Nëna iu drejtua “Ka një Mesazh për Ty” për t’i bërë një kërkesë të veçantë asaj. E veshur me xhinse, këmishë dhe flokët e shkurtëra, Joana hyri në studion e “Të Dielës Shqiptare” duke hamendësuar se kush mund të ishte pas murit. Nuk u çudit kur pa se ishte e ëma.
E shqetësuar për të ardhmen e së bijës, Menka i kërkoi publikisht t’i fliste hapur për dëshirat e saj, siç nuk e bënte kurrë. Por Joana tregoi se e kishte shumë të qartë atë çfarë kërkon për veten: dëshiron të shkojë të jetojë në Kanada, sepse beson se atje ofrohen mundësi të mëdha për të rinjtë.
Por e ëma ka një peng tjetër: dëshiron që e bija të vishet më në stil vajzash. Megjithatë, edhe për këtë pjesë Joana i ka idetë e qarta.
“Është zgjedhje e imja personale, më vënë shumë në siklet kur më pyesin: “Pse vishesh kështu?”.”, tha Joana. Ajo foli pak, por sqaroi se kështu ndihet komode dhe nuk sheh arsye për të ndryshuar veshjen e saj. Menka nuk kish zgjidhje tjetër veçse ta pranonte. Por së paku mundi të merrte premtimin e së bijës se tani e tutje, do të fliste më shumë me të.
“Do të flas pak më shumë me të.”, pranoi Joana duke qeshur./Anabel.al/
