Subvencionim qiraje për një vit rresht për 99 familje që banojnë në kryeqytet, por e kanë të pamundur të paguajnë qiranë e banesës. Publikohen emrat e familjarëve që Drejtoria e Strehimit të Bashkisë Tiranë i ka nisur për t’u miratuar sot në mbledhjen e radhës së Këshillit Bashkiak. Mësohet se kanë qenë rreth 209 persona që kanë aplikuar për të fituar bonus strehimi, por për shkak të dokumentacionit të paplotë, pjesa tjetër do të trajtohen në një kohë të dytë. Po ashtu, pesë aplikantë që plotësojnë kushtet, aktualisht trajtohen me bonus nga Ministria e Zhvillimit Urban.
Për këto familje është vendosur që në përfundim të afatit të përfitimit të pagesës nga MZHU do të trajtohen nga Bashkia e Tiranës (me dokumentacionin të rinovuar). Nga totali i familjeve që pranohen në skemën e bonusit të strehimit, jo të gjithëve do t’u mbulohet qiraja e plotë për banesën. Sipas relacionit të dërguar në këshill, vetëm 16 prej tyre përfitojnë bonus qiraje në masën 100%. Më konkretisht, bëhet fjalë për familje që banojnë në afërsi të landfillit të Sharrës, familjet me probleme social-ekonomike e shëndetësore, ato me urdhër mbrojtje, si dhe familjet që kanë përfituar nga vendimet e mëparshme.
Subvencionimi i për strehim është vetëm një nga mekanizmat e zgjedhur nga bashkia, ndërkohë që po punohet për t’i dhënë zgjidhje përfundimtare strehimit të tyre, siç është ndërtimi i banesave sociale me qira. Efektet financiare prej afro 973 mijë lekë në muaj dhe do të përballohen nga bashkia nëpërmjet fondit të posaçëm për “Bonuset e strehimit”. Në listën e projektvendimeve shtesë që do t’i paraqiten sot këshillit janë edhe disa familje që janë prekur nga fatkeqësitë natyrore në Tiranë përgjatë vitit të fundit. /ma.me
