Tirana në volejboll për femra e nis sezonin me notën 10-të, pasi fitoi Kupën e Federatës. Bardheblutë mposhtën në derbin e kryeqytetit Partizanin 3-1. Tirana e jep sinjalin që në startin e setit të parë, ku shkëputet “flash” 5-0 me Kushin e pathyeshme. Të kuqtë u përgjigjen menjëherë.
Një organizim i bukur i Xhekës dhe Matraku kalon topin mbi bllok, ndërsa Nezaj ngushton në -1 pikë (6-7). Në pikën e tetë vjen barazimi i parë, por Shkurti është e frikshme në sulm dhe i jep ekipit sërish kryesimin në +3 pikë (11-8). Tirana mbron shumë mirë dhe ecën papara 14-10. Pas pushimit të dytë teknik janë të besuarat e trajnerit Gorenca që e shohin veten superiore 16-10, 22-17.
Tuci çon dëm një sulm për të kuqtë, ndërsa Matraku u dhuron pikën e 25-të rivaleve nga shërbimi dhe Tirana fiton setin e parë 25-21. Seti i dytë nis me një tjetër marsh për vajzat e trajnerit Tarja dhe Tuci bën “autokritikë”. Partizani kryeson 5- 1, çka detyron trajnerin Gorenca të thërrasë pushimin e detyruar. Skuadra e kuqe shfaqet më entuziaste në këtë fillim seti përballë një Tirane të përgjumur.
Partizani është perfekt me organizimin e Xhekës që përgjigjet me epërsinë 8-2, 15-8. Por, nga kampi tjetër shtohen forcat dhe për çdo top që luhet ka konkurrencë të fortë. Dyshja Blloku-Nezaj neutralizon Kolen në bllok. Mbyllja e setit është dramatik. Me gjithë barazimin e kapitenes Shkurti në pikën e 23-të, fundi i setit shkoi në favor të kundërshtarit 25-23. Edhe seti i radhës nis nën dominimin e Partizanit 8-5, 12-8, 14-10.
Disa gabime në sulm për Partizanin dhe një shërbim model i Shirës vendos gjithçka në ekuilibër 14-14. Pika e 15-të maratonë i shkon Tiranës për fat. Pas pushimit të dytë teknik janë bardheblutë që marrin situatën nën kontroll 18-14. Trajneri Tarja kërkon pushim që vlen dyfish si frymëmarrje për të dy kampet. Sallaku udhëheq të vetat me një epërsi komode 21-16.
Tekniku Tare i jep mundësi pak minuta edhe të resë Fetaj. Në fund të setit është organizatorja Kokonozi që zgjidh gjithçka vetë me një ngecje “pikante” dhe Tirana kalon para 2-1 me sete pas fitores 25-16, duke vënë një dorë te trofeu. Dhe këtë e legjitimon në setin e katërt, pasi e mbyll 25-20 dhe 3-1 finalen.
Te Tirana ka nisur festa. Më pas mes dy kampeve respektive ka “fair play”, ku humbësi përgëzon fituesin dhe kapitenia Shkurti ngre lart trofeun. Më pas, festa u lë radhën fotove të rastit. Ky aktivitet u organizua nga Federata Shqiptare e Volejbollit, me pjesëmarrjen e katër skuadrave më të mira të sezonit të kaluar, që konfirmuan në këto tri ditë se do të jenë pretendente për titull është këtë sezon.
a.ç
