108 vjet më parë patriotët e Tiranës hoqën flamurin e Perandorisë Osmane për ta zëvëndësuar atë me flamurin e kuq dhe shqiponjën e zezë, simbol i shtetit shqiptar. Ngritja e flamurit nga personalitete të njohur si Refik e Murat Toptani u bë vetëm dy ditë para se Ismail Bej Qemali të ngrinte flamurin shqiptar në Vlorë dhe të shpallte pavarësinë e vendit. Për të nderuar këtë vepër, Bashkia e Tiranës e ka përkujtuar sot përmes një ceremonie të veçantë para ndërtesës ku u bë ngritja e flamurit.
Në mesazhin e tij, kryebashkiaku Veliaj thekson se sakrifica e patriotëve të Tiranës mbetet e pavdekshme dhe e patjetërsueshme.
“Përulje dhe nderim para veprës së paçmueshme të patriotëve të Tiranës, që më 26 Nëntor 1912 ngritën flamurin në qytetin që, pak vite më vonë, do të kthehej në kryeqytetin e të gjithë shqiptarëve.
Sakrifica juaj mbetet e pavdekshme dhe e patjetërsueshme!
Gjithmonë mes nesh”, shkruan Veliaj.
