Beteja e 11 majit do të zbresë në Qarkun e Tiranës “gladiatorët” më të rëndësishëm të skenës politike. Ndryshe nga zgjedhjet e 2021, kur drejtuesit e 3 partive kryesore në vend nuk e përqendruan betejën e tyre elektorale vetëm në Tiranë, këtë herë qarku që prodhon më shumë se 25% të mandateve në vend, i ka mbledhur figurat kryesore të politikës së 35 viteve pluralizëm.
Në listën rozë, kryesocialisti Edi Rama ka bërë një ndërthurje të drejtuesve politikë, ministrave të kabinetit qeveritar dhe figura të reja që morën jo pak vëmendje për atë që përfaqësojnë. Pjesa më e madhe e listës së sigurt dominohet nga gratë, me 8 kandidate, e vetëm 4 burra.
Lista, që udhëhiqet prej numrit një të socialistëve, i cili në 2021 kandidoi në Vlorë e Durrës, pasohet nga dy drejtueset politike të Tiranës, Ogerta Manastirliu dhe Elisa Spiropali. Pas tyre, Rama rikthen ish kryeparlamentaren Lindita Nikolla, e cila pasohet nga drejtuesi i diasporës Taulant Balla, ministrat Pirdeni, Koçiu, Hasanaj e Delina Ibrahimaj.
Lista e PS për Qarkun Tiranë
Ndryshe nga socialistët, demokratët kanë rezervuar vetëm 4 vende në listën e sigurt të Tiranës për gratë, edhe ato të diktuara nga respektimi i kuotës gjinore.
Në listën e Tiranës, që njëjtë si te PS drejtohet nga i pari i selisë blu, Sali Berisha, janë strehuar besnikët e kryedemokratit, Noka Vokshi, drejtuesi politik Belind Këlliçi e Paloka, ndërsa ashtu si edhe te socialistët një vend i është rezervuar drejtueses së diasporës, Jozefina Topalli. Kjo e fundit, e rikthyer në PD nga Sali Berisha, ndryshe nga zgjedhjet e kaluara, kur kërkonte votë kundër PD-së për partinë e saj të sapoformuar.
Në listën e fiksuar, Berisha rikthen deputet Klevis Balliun dhe bën ligjvënës për herë të parë, kreun e Forumit Rinor Besart Xhaferrin, që gjithsesi nuk është një figurë e re politike. Ndryshe nga PS vendet e rezervuara për figurat e reja, Berisha i ka mbushur me aleatë, plot 4 të tilla duke i lënë në betejën për votë preferenciale të rinjtë që synojnë një mandat deputeti.
Lista e PD për Qarkun Tiranë
Qarku i Tiranës, më shumë se 11 të tjerët, duket se në zgjedhjet e ardhshme do të rezervojë edhe përballje të forta mes llojit. Në listën e Partisë Socialiste figura të rëndësishme senatorësh si Pandeli Majko, Erion Braçe, Fatmir Xafaj, Mimi Kodheli, Olta Xhaçja, Xhemal Qefalia, Toni Gogu etj do të kërkojnë votën e socialistëve për një mandat ligjvënësi. Një situatë e njëjtë paraqitet edhe në kampin tjetër, kur lufta mes Ilir Metës, Shpëtim Idrizi, Jorida Tabakut, Ilir Alimehmetit, Grigels Muçollarit etj do të jetë shumë e ashpër për një karrige në Kuvendin e ardhshëm.
Nën sigla të tjera, në Tiranë mandat kërkojnë edhe Lulzim Basha, Dashamir Shehi me Enkelejd Alibeaj, Agron Shehaj e Adriatik Lapaj.
