Kryetari i Partisë Demokratike, Sali Berisha, gjatë mbledhjes së Kryesisë është shprehur se nuk shtyhet më protesta. Ai paralajmëroi që ditën e nesërme do të takohet me kryetarët e degëve të Tiranë për të ndarë detyrat dhe për t’u angazhuar në një veprimtari shumëplanëshe. Sipas Berishës, qeveria i ka kaluar linjat e kuqe. Ai theksoi se do të takohet me të gjithë faktorët e Frontit për Shpëtimin e Shqipërisë. Po ashtu, ai hodhi akuza ndaj qeverisë se po përgatiten prapë që të vjedhin zgjedhjet, por opozita nuk do ta lejojë.
“Nuk shkohet më në këtë mënyrë. Ky duhet të përballet me qytetarët. Ndaj dhe nesër do të takohem me kryetarët e degëve të Tiranës, të ndajmë detyrat dhe të angazhohemi në një veprimtari shumëplanëshe. Primaret janë primare, protestat janë protesta. Nuk shtyhet më protesta, përkundrazi. Ky ka një cinizëm ekstrem ndaj qytetarëve shqiptarë.
Linjat e kuqe i ka kaluar kjo qeveri, ndaj dhe sytë, mendjet, zemrat e shqiptarëve janë të përqendruara tek opozita dhe PD-ja. Ne nuk do t’i zhgënjejmë. Tirana në krye dhe beteja fillon. Do të marr takim me të gjithë faktorët e Frontit për Shpëtimin e Shqipërisë, me forcat e tjera aleate me sindikatat dhe do të fillojmë një lëvizje shpëtimtare për Shqipërinë. Përndryshe kjo qeveri nuk ka të ndalur. Kanë filluar përsëri të grumbullojnë letërnjoftimet.
Po përgatisin prapë kasaphanën zgjedhore. Jo do i dalim përpara ne këtyre. Në të gjitha takimet këto dy do jenë çështjet më kryesore tona. Këto të dyja do jenë tematikat tona. Primaret, nuk lëshojmë ne zgjedhjet. Në zgjedhje do marrim pjesë dhe do fitojmë. Asgjë nuk na detyron ne që të shmangemi nga procesi zgjedhor dhe nga fitorja në zgjedhjet e ardhshme. Por asgjë nuk na pengon ne për të përmbushur detyrimet ndaj çdo qytetari shqiptar”, u shpreh Berisha.
/a.r
