Kryetarët e Komunave të Prishtinës, Tetovës, Ulqinit dhe Preshevës kanë mbërritur Tiranë, për të vijuar me axhendën e përgatitur nga Bashkia e Tiranës, e cila kulmon ditën e Dielë me organizimin e Konferencës së parë të Unionit të Bashkive Shqiptare në Rajon.
Kryetari i Bashkisë së Tiranë, Erion Veliaj i ka pritur sot në orën 09.30 krerët e Bashkive Shqiptare të Rajonit dhe delegacionet që i shoqërojnë ata.
Në një deklaratë të përbashkët, Veliaj pohoi se duke nisur nga Tirana do të nisin projekte gjigande dhe se do të shtrihet bashkëpunimi i ndërsjellë mes këtyre 5 bashkive. Ai theksoi se kjo kauzë shqiptare është një sfidë e përditshme, ndërsa shtoi se ky është shekulli i shqiptarëve të mirë që punojnë.
“Nuk është projekt nacionalist, por praktik. Fati i Shqipërisë është që rrethohemi nga shqiptarë përreth. Tirana mund të jap në shkëmbim. Unë besoj se ky është shekulli i shqiptarëve të mirë që punojnë, që i kanë fokuset tek puna dhe çdo njeri nuk jeton dot me slogane. Jeta e përditshme nuk është një ndeshje futbolli, pasi ka probleme të përditshmërisë. Duke nisur nga uji, trafiku. Dua të përshëndes 4 vëllezërit, kolegët e mi, që kauzën nuk e përdorin vetëm gjatë festave. Suksesi juaj është dhe suksesi ynë.”, tha Veliaj.
Më pas, në orën 12:00, delegacionet nga Prishtina, Tetova, Ulqini dhe Presheva do të marrin pjesë në ceremoninë që do të zhvillohet me familjet firmëtare te Monumenti i Pavarësisë, në Parkun Rinia, që i paraprin festimeve të 104 vjetorit të Shpalljes së Pavarësisë së Shqipërisë.
Gjatë qëndrimit të tyre dy ditor në Tiranë, delegacionet do të vizitojnë në terren edhe disa nga projektet madhore që Bashkia e Tiranës ka nisur të zbatojë, si rehabilitimi i Sheshit “Skënderbej”, i cili është konceptuar që të përfaqësojë të gjitha trevat shqiptare, apo rindërtimi i stadiumit “Qemal Stafa”.
Ndërkaq, ditën e Dielë, duke nisur nga ora 10:00, nën kujdesin e Bashkisë së Tiranës, do të mbahet Konferenca e Unionit të Bashkive Shqiptare të Rajonit në Hotel Plaza.
Me këtë rast, kryetari i Bashkisë së Tiranës, Erion Veliaj, do të mbajë fjalën e mirëseardhjes, e cila do të pasohet më pas edhe nga fjalët përshëndetëse të kryetarit të Komunës së Prishtinës, z. Shpend Ahmeti, kryetarit të Komunës së Preshevës, z. Shqiprim Arifi, kryetares së Komunës së Tetovës, znj. Teuta Arifi, si dhe nga kryetari i Bashkisë së Ulqinit, z. Nazif Cungu.
Mandej, konferenca do të vijojë me prezantimin dhe shkëmbimin e eksperiencave të bashkive shqiptare në rajon, si dhe në fund të saj do të nënshkruhet një marrëveshje bashkëpunimi mes 5 kryetarëve të bashkive shqiptare.
