Nuk ka fitues në super sfidën mes Skënderbeut dhe Tiranës në Korçë, një barazim 1-1, edhe pse rastet për gol nuk munguan. Pavarësisht diferencës në klasifikim, në fushë diferencat nuk ishin të mëdha.
Madje ishin bardheblutë ata që kaluan të parët në avantazh me anë të Hasnit, por vendasit nuk u dorëzuan dhe e gjetën barazim në fund me Jonh. Elementi i vetëm që i mungoi kësaj ndeshje ishin tifozët, të cilit nuk ishin në fushë për shkak të dënimit të fushës së Skënderbeut.
Pjesa e parë foli për Tiranën, që e nisi mirë ndeshjen duke kaluar në avantazh pas 20′ minutash lojë me anë të Edon Hasanit. Mesfushori shkodran shfrytëzoi një kros të ardhur në zonë dhe me kokë mposhti portierin Teqja.
Në disavantazh Skënderbeu hidhet në sulm dhe i afrohet golit me anë të Gripshit, i cili provon me një goditje të bukur nga e djathta, por Lika kontrollon në dy kohë (35′).
Bardheblutë përgjigjen pak para fundit me anë të Kobina, por sfera përfundon mbi traversë, pasi më parë është devijuar. Ky fraksion u mbyll me avantazhin e miqve.
Me të filluar pjesa e dytë Skënderbeu hidhet në kërkim të golit. Pas një kombinimi me Vangjelin, Muzaka gjuan në portën e Likës, por ky i fundi e ndal pa problem (48′). Pas fillimit të furishëm bardhekuqtë nuk arrijnë të depërtojnë mbrojtjen e kryeqytetasve.
Në këto minuta mungojnë rastet e rrezikshme, pasi loja zhvillohet në mesfushë ku spikasin dyluftimet. Skënderbeu i afrohet barazimit me mesfushorin Demte, i cili tenton nga hyrja e zonës, por sfera përfundon mbi traversë (69′).
Në disavantazh Shehi bën edhe dy lëvizjet e fundit duke aktivizuar Oto John në vend të Abazit dhe sulmuesi nuk zhgënjeu.
Pas një goditje këndi të ekzekutuar nga Radas, John, fitoi duelin me mbrojtësit e bardhebluve dhe me kokë e dërgon sferën në rrjetë.
Goli u jep zemër vendasve që e sulmojnë me të gjitha forcat kundërshtarin. Brenda pak minutash Krasniqi ka dy mundësi mjaft të mira për të shënuar, por nuk arrin të mposht portierin Lika.
Në minutat e fundit loja spostohet sa në një portë në tjetrën. Blazhevski në shtesë pati rastin e artë për të shënuan golin e fitores, por gabon përballja Teqjas, i cili bën një dalje vendimtare duke i mohuar golin sulmuesit të bardhebluve. Me këtë rast u mbyll edhe ndeshja 1-1.
