Mungesa e ujit të pijshëm në banesat e kryeqytetit, bizneset, apo dhe spitalet siç ishte rasti i “Shefqet Ndroqit”, ka ngritur shqetësime të shumta për mënyrën se si UKT-ja ka menaxhuar këtë nevojë jetësore në Tiranë.
Deputetja e Partisë Socialiste, Anila Denaj, ishte e ftuar pasditen e sotme, 25 shtator 2025, në rubrikën “Përballë Lajmit” në Klan News, me moderatorin Drini Zeqo, ku dhe ka dhënë më shumë sqarime lidhur me këtë problematikë.
Teksa kujtojmë se një ditë më parë, 24 shtator 2025, kryeministri Edi Rama, në mbledhje me socialistët, siguroi se do të ketë reforma në ujësjellës, hapësirat publike, energjinë elektrike, transporti publik, si dhe ngritjen sipas kriterëve përcaktuese të kopshteve dhe çerdheve në kryeqytet.
Duke u ndalur tek ujësjellësi, Rama premtoi ngritjen e një kompanie publike për furnizimin me ujë të pijshëm. Kështu, Denaj sqaroi në fjalë të tjera se këto reforma të paralajmëruara nga Rama ndodhen në “defter” prej kohësh e që do të marrin jetë në të mirë të procesit të integrimit të Shqipërisë në Bashkimin Evropian.
“Kryeministri ka lajmëruar këto reforma prej kohësh. Është pjesë e programit qeverisës, ku absolutisht prevalon objektivi i integrimit të Bashkimit Evropian. Por, siç e thash e më parë, nevoja për të sjellë një shërbim cilësor, institucione të forta, brenda procesit të integrimit është absolut”, tha ajo.
Socialistja, sqaroi se shërbimi i furnizimit me ujë ka qenë përgjegjësia e pushtetit vendor, por pavarësisht ndryshimeve, ka nevojë për një menaxhim më të centralizuar e më efektiv.
“Shërbimi, i cili deri më tani ka qenë në përgjegjësi administrimi, menaxhimi të pushtetit vendor, sigurisht ka bërë hapa cilësorë përgjatë viteve të fundit, por ka nevojë për një menaxhim akoma e më të centralizuar, ku objektivi të barazopeshojë edhe nevojë për investime, e për nevojën për menaxhim efektiv”, tha ajo.
Denaj shtoi se një menaxhim i mirë, shërbim cilësor dhe investime të duhura, do të sjellin një rezultat final, i cili supozohet të jetë më pozitiv, duke përfshirë këtu të gjitha reformat e premtuara, jo vetëm atë të ujësjellësit.
“Formula e një menaxhimi të mirë-orientuar drejt, shërbimi cilësor dhe investimeve të duhura, janë ato që do sjellin dhe rezultatin final në fund”, shtoi socialistja.
Ajo nuk mohoi rëndësinë e furnizimit me ujë pavarësisht vendndodhjes së banorëve, teksa “rikujtoi” dhe detyrimin e qytetarëve për pagesën e çdo shërbimi.
“Kudo që të jetojmë, mund të jetojmë në qytet, në zona ruralë, nevoja për furnizimin e qëndrueshëm me ujë të pijshëm, por njëkohësisht dhe detyrimi për të paguar çdo shërbim, sigurse energjia dhe pjesa e mnaxhimit të mbetjeve, e bën të gjithë infrastrukturën, për nee si qytetarë, por dhe ata që i bashkohet Shqipërisë për disa muaj…”, tha ajo.
