SHBA-ja nuk do t’i qëndrojë marrëveshjes për programin bërthamor iranian nëse janë futur ndryshime, sepse teksti duhet të rishikohet vërtet, deklaroi sekretari amerikan i Shtetit, Rex Tillerson.
“Parregullsia më flagrante e marrëveshjes së arritur në vitin 2015 me fuqitë e mëdha është fakti se ajo ka një fund dhe vetëm shtyn problemin për më vonë”, theksoi ai për stacionin televiziv Fox News, në kuadër të Asamblesë së Përgjithshme të përvitshme të OKB-së.
“Kjo nënkupton se ne mund të fillojmë të numërojmë mbrapsht deri në momentin që ata të rifillojnë kapacitetet e tyre bërthamore ushtarake”, shprehu keqardhje kreu i diplomacisë amerikane.
Presidenti amerikan, Donald Trump, i cili ka kritikuar sërish ashpër marrëveshjen iraniane para OKB-së, duhet të vendosë, deri në mes të muajit tetor, nëse çertifikon ose jo para Kongresit faktin se Teherani respekton apo jo angazhimet e tij.
Në rast të moscertifikimit, parlamentarët amerikane do të mund të rivendosin sanksionet e hequra në kuadër të marrëveshjes.
“Presidenti kërkon vërtet ta ribëjë këtë marrëveshje, ta rinegociojë dhe ne kemi nevojë për mbështetjen e aleatëve tanë evropianë dhe të të tjerëve për të bërë të kuptueshme edhe për Iranin se kjo marrëveshje duhet të rishikohet vërtet”, nënvizoi Rex Tillerson.
“Nëse ne do të qëndrojmë në këtë marrëveshje, duhet të ndodhin ndryshime”, shtoi ai.
Teherani dhe evropianët refuzojnë të rinegociojnë marrëveshjen historike që synon të garantojë karakterin shumë civil të programit bërthamor iranian në këmbim të heqjes progresive të sanksioneve./ b.d
