Presidenti Donald Trump nxorri një urdhër ekzekutiv që i kërkon kompanisë kineze ByteDance të shesë ose të largojë nga Shtetet e Bashkuara biznesin e saj TikTok brenda 90 ditëve. “Ka prova të besueshme që më bëjnë të mendoj se ByteDance … mund të ndërmarrë veprime që kërcënojnë dhe dëmtojnë sigurinë kombëtare të Shteteve të Bashkuara”, nënvizon Trump në urdhrin e tij.
Urdhri është një lajm i mirë për të ardhmen e aplikacionit TikTok, të paktën krahasuar me një urdhër të mëparshëm sipas të cilit, dyqanet e aplikacioneve me bazë në SHBA duhet të ndërprisnin shpërndarjen e aplikacionit TikTok nëse ByteDance nuk arrinte një marrëveshje për t’u larguar brenda 45 ditësh.
Urdhri i ri i lë një kohë më të gjatë kompanisë ByteDance për të arritur një marrëveshje të mundshme për TikTok në SHBA.
I menjëhershëm ka qenë edhe reagimi i kompanisë ByteDance, sipas së cilës TikTok pëlqehet nga rreth 100 milionë amerikanë pasi është një aplikacion për argëtim, vetë-shprehje dhe lidhje të ndryshme. “Ne jemi të përkushtuar të vazhdojmë të sjellim gëzim për familjet dhe karrierë domethënëse për ata që krijojnë në platformën tonë për shumë vite që vijnë”, theksohet në deklaratën e ByteDance.
Ndërkaq, Microsoft ka konfirmuar se po zhvillon bisedime me ByteDance për të blerë biznesin e saj në SHBA, Kanada, Australi dhe Zelandën e Re. Kompania shihet si ofertuesi kryesor dhe vlera e një marrëveshje të mundshme arrin nga 10 miliardë deri në 30 miliardë dollarë.
