Tifozët serbë të Cërvena Zvezdës nuk kanë të ndalur me fyerje e provokime ndaj Kosovës dhe UEFA-s. Ata të martën mbrëma, në ndeshjen kthyese të xhiros së dytë të Ligës së Kampionëve ndërmjet ekipit vendas, Cërvena Zvezda dhe Valettas së Maltës, kanë shfaqur një koreografi, që sipas vetë medieve serbe, pritet të marrë goditjen e ashpër të UEFA-s.
Pak para ndeshjes së zhvilluar në Beograd, në tribunën veriore të stadiumit “Rajko Mitiq”, është parë një koreografi ku shkruhej me shkronja të mëdha “UEFA”. Shkronjat ishin të zeza, kurse hapësira rrethuese e kuqe, pra ngjyrat e flamurit shqiptar, pasi sipas tifozëve serbë, UEFA hapur po përkrah Kosovën dhe shqiptarët, transmeton Koha Ditore.
Midis fjalës “UE-FA” është krijuar edhe një imazh i një djaloshi që shkul një kryq nga kulmi i kishës, e që sipas serbëve, ka ndodhur diku në Kosovë më 2004.
Klubi serb Cërvena Zvezda nuk ka reaguar për incidentin në tribuna, ndërkohë mediet serbe, pos që kanë shpjeguar prapavijën e gjithë kësaj, kanë treguar se UEFA ka nisur hetimet për këtë dhe se pritet të ndëshkojë rëndë klubin dhe tifozët nga Beogradi.
Kjo në fakt, nuk është hera e parë që tifozët e këtij klubi, të njohur për qëndrime nacionaliste, fyejnë Kosovën dhe UEFA-n, por kjo është hera e parë që këtë e bëjnë në ndeshje zyrtare të një gare që e organizon vetë Shtëpia Evropiane e Futbollit.
Ndeshjen e së martës e fitoi Cërvena Zvezda 2:1 dhe me rezultat të përgjithshëm 4:2 u kualifikua në xhiron e tretë të Ligës së Kampionëve, ku do të ndeshet me kampionin e Bullgarisë, Ludogorets. (b.an)
