Pas ndryshimeve të shumta në përbërjen e lojtarëve, Prishtina ka hyrë në një proces të ri me dy aksionarë të klubit që kanë vendosur t’i shesin aksionet.
Një ditë më parë, nënkryetari i klubit prishtinas, Ismet Begolli dha dorëheqje nga ky post ndërkaq, edhe aksionari tjetër Rrahman Haradini, përmes telefonit e ka konfirmuar për KTV-në se do t’i shes aksionet e klubit, pasi nuk pajtohet me veprimet e fundit të anëtarëve të bordit.
Nga ana tjetër, anëtari i bordit të FC Prishtinës, Afrim Muqiqi, e ka konfirmuar se janë njoftuar nga Begolli dhe Haradini për t’i shitur aksionet.Të pakënaqur me situatën e krijuar janë edhe tifozët e Prishtinës, Plisat.
Lideri i këtij tifogrupi, Albert Kastrati, tha se po ndihen të tradhtuar me largimet e fundit.
Të kujtojmë që nga Prishtina janë larguar shtatë futbollistë duke ndërprerë bashkëpunimin, ndër ta edhe i biri i nënkryetari të klubit, Gentrit Begolli. (b.an)
