Situata te Bylisi është e nderë. Skuadra ballshiote nuk po e gjen dot veten as në fushën e vet, ndaj vijon të jetë e parafundit në klasifikimin e Superiores pas 12 javësh kampionat. Raporti me tifozët është konfliktual, tashmë, që pas ndeshjes së luajtur në Pukë, ku mallakastriotët u mundën me rezultatin 4-2. Mediat sportive në vend, specialistë të ndryshëm të futbollit, por edhe vetë tifozët e kësaj skuadre ngritën dyshime për trukim të rezultatit.
Edhe Komisioni i Etikës ka nisur një hetim për këtë gjë, kështu që pritet vendimi. Megjithatë, tifo-grupi “Bylinet” vijon të kërkojë përgjegjësi për çka ndodhi, duke mos e mbështetur skuadrën e zemrës në ndeshjen e javës së shkuar, ndaj Tiranës. Në një reagim të radhës, ata i konsiderojnë “servila dhe viktima” tifozët që ishin në stadium, duke paralajmëruar vetëgjyqësi për situatën e skuadrës së zemrës:
“Dëshirojmë t’i pyesim sinqerisht servilat dhe viktimat e sistemit, që ishin të pranishëm në stadium, se si u ndien pas turpit të radhës? Çfarë shije kishte turpi i radhës? Normalisht që jo të gjithë ishin të tillë ata që ishin në stadium, pasi pjesa tjetër ishte e përbërë nga disa 14-15 vjeçarë, të cilët ishin kontaktuar personalisht nga presidenti “i padokumentuar”, duke i hedhur kundër tifozërisë. Mesa u lajmëruam, disa bileta falas u shpërndanë nga një 20-vjeçar me arsim profesional saldator, që disa e njihnin dhe ky i fundit ishte kontaktuar personalisht, gjithashtu. Ne distancohemi kategorikisht nga ky organizim dhe e shpërfillim atë, pasi e kemi deklaruar hapur qëndrimin tonë: Bojkot deri në vendimin e Komisionit të Etikës dhe, nëse ky vendim vonon më shumë sesa koha normale, ne do të riorganizohemi dhe do të vetëgjykojmë situatën. Nëse vërtet mendojnë se i kanë gënjyer sportdashësit e vërtetë mallakastriotë dhe nëse, gjithashtu, mendojnë se i kanë nënshtruar e mund të bëjnë çfarëdo veprimi në dëm të ekipit, u themi: E kanë gabim! Së bashku jemi më të fortë”.
telesport.al
