Tifozat Kuq e Zi kundër qeverisë dhe federatës: Mos na provokoni!
“Tifozat Kuq e Zi” kanë reaguar sot kundër qeverisë shqiptare dhe Federatës Shqiptare të Futbollit lidhur me masat e marra nga këto institucione për ndeshjen e 8 tetorit kundër Serbisë.
Përmes një letre të hapur drejtuar kryeministrit Edi Rama dhe FSHF-së, TKZ shprehet kundër “nëpërkëmbjes së të drejtave të tifozëve”.
Ata e cilësojnë shkelje të të drejtave të njeriut ndalimin e Ismail Morinës për të qenë në “Elbasan Arena” të enjten e ardhshme, ndërsa dalin edhe kundër pranisë së kryeministrit serb Aleksandër Vuçiç në stadium.
Në fund tifozët kërcënojnë se, “nëse institucionet nuk heqin dorë nga këto provokime, atëherë përgjegjësia për çdo ngjarje të pakëndshme do të bjerë mbi ju”.
Letra e plotë:
“Kryeministrit të Shqipërisë, Edi Rama
Federatës Shqiptare të Futbollit
‘Tifozat Kuq e Zi’ gjejnë shkas ndeshjen e 8 tetorit mes Kombëtares shqiptare dhe serbe t’u adresohen dy organizatorëve të kësaj ngjarjeje, qeverisë shqiptare dhe Federatës Shqiptare të Futbollit.
Nuk besojmë se ka ndonjë shqiptar që nuk është i interesuar që ndeshja të mbyllet në suaza të ‘fair-play’-it, pavarësisht ngjarjeve vitin e kaluar në Beograd.
Si grupim, organizimet tona i kemi nisur shumë muaj përpara, fillimisht me anëtarësinë e gjerë për t’ia shpjeguar secilit rëndësinë e veçantë që ka kjo ndeshje duke marrë përgjegjësitë dhe detyrimet që na takojnë në tribunë. Por duket se këto përpjekje po minohen nga qeveria shqiptare dhe Federata Shqiptare e Futbollit.
Nuk jemi aq naivë sa të kërkojmë heqjen e masave të sigurisë, madje përshëndesim gatishmërinë për çdo eventualitet, por jemi të frustruar nga mënyra se si praktikohen këto masa, duke shtypur, shkelur dhe dhunuar tifozët shqiptarë.
Na ndalohen veshjet që nuk na janë ndaluar në asnjë stadium në transferta, ftohen studentë serbë ndërsa ne nuk u lejuam në Beograd, dhe sikur të mos mjaftonte kjo, ftohet edhe kryeministri i serbëve!
I nderuar kryeministër, një ndër vetitë më fisnike që karakterizon shqiptarët është mikpritja. Shqiptari e ka shtëpinë e madhe dhe zemrën e madhe; zaten edhe Kanuni e thotë se ‘shpija e shqiptarit është e Zotit dhe e mikut’. Por me këto ftesa ju nuk i shërbeni qetësisë, ju provokoni direkt ndjenjat tona, provokoni lojtarët që mezi shpëtuan të gjallë nga tmerri i Beogradit, dhe përfundimisht luani me ndjenjat tona, duke përdhosur edhe figurat tona kombëtare për teket tuaja.
Nuk duam t’i urojmë mirëseardhje një njeriu i cili kurrë nuk ka qenë miku jonë, nuk është miku jonë, nuk dëshiron të jetë miku jonë dhe kurrë nuk do bëhet miku jonë. Nuk do ju përziheshim në ftesat që mund t’i bënit për në oborrin e Kryeministrisë apo të ndonjë hoteli për ndonjë konferencë por, ju lutem… jo në stadium, jo një njeriu që qëndroi indiferent në stadiumin ku në kor u thirr ‘vritni shqiptarët’, dhe për këtë fajësoi shqiptarët!
Në anën tjetër, Federata Shqiptare e Futbollit përmes sekretarit të saj, dje ka treguar se si nuk do të lejohet hyrja e anëtarit tonë, Ismail Morina (i njohur si “Ballisti”).
Ky është absurditet, është servilizëm i pashoq karshi kërkesave të serbëve, dhe për më tepër është i paligjshëm. Anëtari në fjalë nuk ndiqet penalisht nga asnjë institucion kompetent ligjor dhe ndalimi i tij është shkelje e rëndë e të drejtave të njeriut.
Ky veprim i papërgjegjshëm është hedhje benzinë në zjarr. Për më tepër as edhe Gjykata e Arbitrazhit Sportiv (CAS) nuk e ka shpallur fajtor ‘dronin e Ballistit’ për ndërprerjen e ndeshjes.
Duke marrë parasysh gjithë këta faktorë dhe duke uruar për mbarëvajtje të qetë të ndeshjes së 8 tetorit, TKZ u bën thirrje dy organizatorëve të ndeshjes të heqin dorë nga këto provokime dhe të mos nxisin pakënaqësi duke ushtruar dhunë psikologjike e duke eksperimentuar me durimin tonë. Në të kundërt, për çfarëdo ngjarje të pakëndshme si pasojë e veprimeve tuaja, përgjegjësia dhe turpi do të bien ekskluzvisht mbi ju.
Ju lutem, mos luani me ndjenjat tona.
Ju lutem mos na provokoni”.
