Autoritetet e Aeroportit të Rinasit e kanë njoftuar policinë për grabitjen e kryer në aeroport teksa makina e përdorur nga grabitësit ishte ende në vendin e ngjarjes, ndërkohë që në pistë kishte policë. Kjo është deklarata e drejtoreshës së komunikimit me median e TIA-s, Arlinda Çausholli.
Çausholli dha se TIA i ka ndjekur me shqetësim raportet e pasakta të policisë, ndërkohë që bëri thirrje për kujdes në raportimet e medias në lidhje me personat e akuzuar, të cilët prezumohen të pafajshëm deri në momentin e vendimit të gjykatës.
“TIA ka ndjekur edhe raportimin e policisë që e kondiderojmë të pasaktë. TIA ka zbatuar procedurën e njoftimit në kohë të policisë. Autoriteteve u janë dorëzuar provat. Punonjësit e policisë kanë qenë prezent në pistë pak metra larg nga ndodhi ngjarja. TIA sjell në vëmendjen se kompania ICTS është përgjegjëse vetëm për sigurinë aeroportueale. ICTS s’ka të drejtë të ndërhyjë fizikisht. ICTS operon e paarmatosur. Lidhur me ruajtjen e rendit e sigurisë kjo është përgjegjësi e plotë e policisë. Policia duhet të sigurojë patrulla për të parandaluar incidente” ka thënë Çausholli.
Ajo ka shtuar se, siguria kombëtare është përgjegjësi e të gjithëve dhe jo vetëm e TIA-s e cila e ka të ndaluar me ligj që në raste të tilla të përdorë armët.
“TIA është në dispozicion të autoriteteve për zbardhjen e ngjarjeve dhe zbulimin e autorëve. Siguria kombëtare është e përbashkët e gjithë autoriteteve
Incident i rëndë, shfajësimi është pasojë më e rëndë. Aeroporti është i të gjithëve.” tha ajo.
Çausholli ka theksuar se TIA i ka dhënë të gjitha provat e duhura institucioneve që janë duke hetuar çështjen, ndërkohë që i ka kërkuar atyre që të jenë të kujdesshëm në dhënien e informacioneve.
“TIA ka vënë ne dispozicion të gjitha kamerat e sigurisë që hedhin dritë për ngjarjen. Në respekt të hetimeve dhe imazhit të Shqipërisë dhe personave që janë nën hetim, bëjmë thirrje për trajtimin e kujdesshëm të informacioneve” ka thënë ajo.
Duke u ndalur tek raportet e bëra publike nga Autoriteti i Aviacionit Civil, mbi shkeljet e konstatuara, Çusholli shton se ato kanë pasur përgjigjet konkrete, por nga ana tjetër ajo ka kërkuar konfidencialitet.
“Dokumentet e bëra publike kanë pasur përgjigjie përkatëse, u janë dhënë organeve kompetente që po hetojnë. TIA kërkon etikë konfidencialiteti të respektohej nga të gjitha institucioneve.” shtoi ajo.
Çausholli ka theksuar se TIA flet pikërisht tani, pasi po cenohet kompania që është në shërbim të të gjithëve, ndërkohë që shton se grabitja e ndodhur më 30 qershor është një ngjarje e rëndë. Sakaq, TIA siguron pasagjerët dhe partnerët për masat e sigurisë që janë në nivele të kërkuara.
“Po flasim tani, duke vënë re se po cënohet kompania që është në shërbim të të gjithëve. TIA shpreh keqardhje që ka tronditur të gjithë. Fjalët janë të pakta dhe shqetësimi është shumë i madh. TIA siguron pasagjerët dhe partnerët se masat e sigurisë janë në nivelet e kërkuara” tha Çausholli.
d.i.
