‘T’ia mbathësh nga varfëria, për të marrë vetëm biletën e kthimit’
Kur Kleart Hasani dhe 173 të tjerë u transportuan me autobusë në kampet e azilit nëpër Bavari, ishte i gëzuar, por tani e ka mbytur trishtimi, pasi iu refuzua azili. Prestigjiozja “New York Times” u ka kushtuar një reportazh azilkërkuesve në Gjermani, ku personazhi kryesor është shqiptari 20 vjeç. Studentit i ishte mohuar azili, vetëm dy orë pas deklarimit të rastit të tij dhe së shpejti, ai do të kthehet në shtëpi me aeroplan. Artikulli me titullin “T’ia mbathësh nga varfëria, për të marrë vetëm biletën e kthimit”, trajton gjerësisht rastin e studentit shqiptar. “Ai bën pjesë në grupin e azilkërkuesve me shanse afër zeros”, tha Jakob Daubner, i cili menaxhon qendrën. Rreth 10 mijë azilkërkues u riatdhesuan në mes janarit dhe korrikut. Më shumë se gjysmë milion emigrantë kanë mbërritur në Gjermani deri më tani këtë vit dhe 42 për qind e atyre që kanë aplikuar për azil kanë ardhur jo nga Iraku apo Siria, por nga Europa: Shqipëria, Kosova, Maqedonia dhe Serbia, të cilat kanë probleme me varfërinë, papunësinë dhe korrupsionin, por konsiderohen si vende të sigurta. Me disa opsione për të aplikuar për viza pune në Gjermani, emigrantët nga Ballkani Perëndimor shpesh kërkojnë azil. Kur emigrantët mbërrijnë, ata dërgohen nëpër zyra për gjurmët e gishtërinjve, fotografitë dixhitale dhe kontrollin mjekësor. Në zyrën ku Sascha Walter zhvillon intervistat ka një kompjuter, kufje dhe software. Ajo vendos nëse një azilkërkues qëndron ose jo në Gjermani. Klearti tha se kishte mbaruar shkollën e lartë në Shqipëri në vitin 2013 për Teknologji Informacioni. Në qershor iku në Greqi dhe pastaj mori një avion për në Nuremberg, ku donte të studionte dhe punonte.
