Gati 50 ligjvënës gjermanë iu bashkuan të hënën thirrjeve ndërkombëtare që i kërkojnë Izraelit t’i sigurojë menjëherë trajtim mjekësor Dr. Hussam Abu Safiya, drejtor i një spitali në Gaza, i cili mbahet në një burg izraelit pa proces gjyqësor dhe raportohet se ndodhet në gjendje kërcënuese për jetën.
Në një letër dërguar presidentit të Izraelit, Isaac Herzog, të siguruar nga gazeta Haaretz, deputetët nga Partia Social Demokrate Gjermane (SPD), të Gjelbrit dhe partia e majtë Die Linke, i kërkuan Izraelit të bëjë publike akuzat ndaj tij dhe ta lirojë nëse nuk paraqiten akuza të besueshme kundër tij.
Letra, e firmosur nga 48 anëtarë të Bundestagut, parlamentit federal gjerman, u iniciua nga zëdhënësi i SPD-së për politikën e jashtme, Adis Ahmetović, dhe deputetja Isabel Cademartori.
Mes firmëtarëve janë figura të larta partiake dhe deputetë të angazhuar në çështjet e politikës së jashtme, përfshirë kreun parlamentar të SPD-së, Matthias Miersch, zëvendësen e tij Siemtje Möller, bashkëkryetaren e të Gjelbërve Franziska Brantner, ish-ministren e Kulturës Claudia Roth, deputeten e të Gjelbërve dhe zëdhënësen për Lindjen e Mesme, Luise Amtsberg, si dhe bashkëkryetarin e Die Linke, Luigi Pantisano.
Revista gjermane Der Spiegel raportoi të hënën se edhe deputetë nga aleanca konservatore CDU/CSU e kancelarit Friedrich Merz, partneri kryesor në koalicionin qeverisës, ishin ftuar të firmosnin letrën, por refuzuan.
Në kërkesën e tyre, deputetët gjermanë bëjnë thirrje për “akses të menjëhershëm në kujdesin e duhur mjekësor” për Abu Safiyan dhe 13 mjekë të tjerë të ndaluar nga Izraeli. Ata kërkojnë zbatimin e të gjitha trajtimeve të nevojshme mjekësore, si dhe “zbardhjen e menjëhershme dhe shqyrtimin gjyqësor” të akuzave ndaj tyre. Nëse nuk paraqiten akuza të besueshme, ata kërkojnë lirimin e mjekëve.
Në letër, ligjvënësit gjermanë theksuan gjithashtu se Abu Safiya, i cili ishte drejtor i spitalit Kamal Adwan në veri të Gazës, dhe mjekët e tjerë të ndaluar mund të jenë “dëshmitarë të mundshëm të shkeljeve të rënda të të drejtave të njeriut” në Gaza. Sipas tyre, mbrojtja e tyre është thelbësore për ruajtjen e provave dhe për mundësimin e një hetimi të pavarur mbi luftën.
Javën e kaluar, në përgjigje të një kërkese drejtuar Gjykatës së Lartë, qeveria izraelite deklaroi se jeta e Abu Safiyas nuk ishte në rrezik. Reagimi erdhi pasi avokati i tij pretendoi se mjeku ishte rrahur rëndë dhe kishte humbur disa herë ndjenjat gjatë izolimit.
Izraeli tha se Abu Safiya ndodhej nën mbikëqyrje të vazhdueshme mjekësore dhe se i ishin kryer disa ekzaminime pasi ishte transferuar rreth dy javë më parë në një sektor nëntokësor të sigurisë së lartë në një burg në Izraelin qendror. Autoritetet izraelite nuk shpjeguan arsyen e ekzaminimeve.
Në fillim të këtij muaji, organizata Mjekët për të Drejtat e Njeriut – Izrael publikoi një deklaratë të avokatit të Abu Safiyas, i cili raportoi një përkeqësim të rëndë të gjendjes së tij pas vizitës në burg.
Abu Safiya mbahet pa akuza zyrtare në bazë të ligjit izraelit për “luftëtarët e paligjshëm”, i cili lejon ndalimin e personave të dyshuar për veprimtari armiqësore. Në qershor, masa e ndalimit të tij u zgjat edhe me katër muaj të tjerë.
Deputetët gjermanë iu bashkuan kështu thirrjeve në rritje ndërkombëtare që Izraeli të lirojë drejtorin palestinez të spitalit dhe t’i sigurojë trajtim urgjent mjekësor.
Në fillim të këtij muaji, disa deputetë të Partisë Laburiste në Britani i kërkuan qeverisë së tyre që të kërkojë nga Izraeli lirimin e mjekut të burgosur. Më pas atyre iu bashkua edhe ministri britanik për Lindjen e Mesme, Hamish Falconer, i cili tha se kishte “ngritur sërish çështjen e tij me autoritetet izraelite”.
Ndërkohë, kongresmeni demokrat amerikan nga Maryland, Jamie Raskin, deklaroi se Abu Safiya “raportohet se është torturuar në një burg izraelit” dhe kërkoi që qeveria e kryeministrit Benjamin Netanyahu ta lirojë menjëherë nga “kushtet e paligjshme, të tmerrshme dhe kërcënuese për jetën”.
Edhe senatori amerikan Jeff Merkley kërkoi të hënën lirimin e tij të menjëhershëm. Ata iu bashkuan kongresmenes nga Nju Jorku, Alexandria Ocasio-Cortez, e cila më herët tha se, përveç lirimit të Abu Safiyas, Izraeli duhet “të ndalojë shënjestrimin e punonjësve shëndetësorë dhe trajtimin çnjerëzor të palestinezëve në ndalime arbitrare”.
Senatori amerikan Bernie Sanders deklaroi javën e kaluar se Abu Safiya ishte “torturuar dhe rrahur për krimin se drejtonte një spital”, duke akuzuar Izraelin se e kishte “rrëmbyer”. Ndërsa senatori Chris Van Hollen tha se “sipas avokatit të tij, jeta e tij është në rrezik të menjëhershëm pas torturave dhe trajtimit të keq në burg”.
