Ditën e djeshme ish kryeministri Berisha i bëri thirrje bizneseve që të largohen nga vendi, nëse qeveria do të miratonte ndryshimet në kodin penal për kuponin tatimor. Këtë të premte, në diskutimet për buxhetin e vitit të ardhshëm Berisha tha se nuk është aspak i penduar nga kjo deklaratë e tij, madje thotë se ka bërë shumë mirë.
” Çfarë u premton ky buxhet? Largim masiv të biznesmenëve. Dje për herë të parë i kam lejuar vetes të bëjë atë thirrje. E kam pyet veten 100 herë, a bëra mirë apo jo. Unë them kam bërë shumë mirë. Ju po u bëni atë që s’jua ka bërë kush në Evropë. Çfarë kujtoni ju se do krijohen vende pune? Si do japin bankat kredi. Mua, unë s’marr dot, s’jam biznesmen. Kreditë i marrin biznesmenët, por ata po ia mbathin. Një klimë armiqësore e paimagjinueshme. Një nga gjërat më kryesore për të cilat duhet buxheti është të investosh në klimën e biznesit”, u shpreh Berisha.
Në përgjigje të këtyre qëndrimeve, Kryeministri Rama tha se në mënyrë të pandërgjegjshme, tashmë opozita e ka kuptuar se pëderisa populli të jetë në Shqipëri, PD s’do e marrë më pushtetin.
“Vini këtu dhe i thoni njerëzve ikni, ikni se jemi ne këtu, se në mënyrë të pavetëdijshme ju thotë nënndërgjegjja që duhet të iki populli që këtu, që t’ju vi radha juve, se sa kohë që populli të jetë këtu, juve në radhë do jeni”, tha Rama.
