Partia Socialiste konkretizoi sot nismën për të paditur në Prokurori ish – Kryeministrin Berisha lidhur me deklaratat e bëra prej tij për armatosjen e popullsisë në kushtet e mungesës së rendit dhe sigurisë.
Kallëzimi penal është dorëzuar në prokurori nga Nënkryetari i Grupit Parlamentar, Taulant Balla. Akuzat e ngritura nga PS ndaj ish – Kryeministrit janë “thirrje publike për veprime të dhunshme” dhe “armatosje kundër rendit kushtetues”.
“Nëpërmjet veprimeve të tij kriminale, i kallëzuari jo vetëm ka vënë në rrezik, por edhe ka cënuar rendin kushtetues, rendin dhe sigurinë juridike por edhe ka ekspozuar qytetarët përpara një rreziku imediat për jetën, shëndetin dhe pasurinë e tyre. Thirrjet për armatosje të popullatës përbëjnë kanosje dhe sfidim serioz të shtetit ligjor, mbartin rrezikshmëri të theksuar kriminale dhe manifestojnë një qëndrim mospërfillës ndaj jetës së qytetarëve dhe të ardhmes së tyre, duke krijuar premisa reale për situata të rënda kriminale”, thuhet në padinë e deputetëve të Partisë Socialiste.
Deklarata e Berishës, pak ditë më parë, shkaktoi debat edhe në mbledhjen e Grupit Parlamentar Socialist që kishte mbledhur firmat për ndjekjen penale të ish – Kryeministrit.
Berisha u sqaroi në seancë dhe pas saj se kishte bërë thirrje për armatosjen me ligj të shqiptarëve, si në Shtetet e Bashkuara të Amerikës. klan
