Nga Mero Baze
Në ditën e fundit të çdo fushate, ka një trend që bie në sy, dhe ai kuptohet tek “thirrjet e fundit” që bëjnë palët që duan të mbijetojnë, ato që duan të fitojnë dhe ata që janë të sigurt në fitore. Thirrja e fundit dhe versionet rreth saj në këtë fushatë elektorale, kanë të bëjnë si në asnjë rast tjetër, vetëm me një çështje, me konspiracionin se secili e ka rregulluar të bëjë aleancë me Partinë Socialiste. Kjo çështje shtrohet edhe në rastin kur mendohet që socialistët i kalojnë 71 mandate, edhe në rastin kur janë shumë afër tyre.
Në të gjitha thirrjet e fundit të PD dhe Lulzim Bashës, përtej formalitetit të të qenit pretendent fitues, lihet gjithnjë e hapur mundësia e një koalicioni të madh me Partinë Socialiste dhe vazhdimi i paktit për reformën kushtetuese dhe atë elektorale. Gjuha e Bashës në këtë fushatë, ka qenë krejt e ndryshme nga gjuha e Partisë Demokratike në çdo fushatë. Kjo ndoshta dhe për faktin se kjo është fushata e parë elektorale për zgjedhje parlamentare, ku mungon Berisha, por mbi të gjitha për shkak të tërheqjes që ekzisotn në këtë rast, nga “thirrja e fundit” që ngjall besim tek demokratët. Dhe thirrja, apo fjalia që ngjall më shumë besim tek demokratët, është që në rast se nuk ja dalim, kemi PS-në.
Lëvizja Socialiste për Integrim, përkundër retorikës së ashpër të javës që shkoi, dy ditët e fundit sërisht ka nisur të thyejë gjuhën dhe të flasë për shanse të aleancës me PS. Në fakt, politikisht gjuha e egër e Ilir Metës kundër Edi Ramës, mbuloi mrekullisht marrëveshjen e pistë të LSI me PS, para 17 majit. Kjo është e vetmja fushatë elektorale, ku një marrëveshje e pistë mes dy partive, edhe pse e faktuar, nuk u diskutua kurrë, edhe pse solli luftë në fushatë, kurse një marrëveshje që solli paqen si ajo mes PD dhe PS, u përfol më shumë se çdo gjë.
Të gjithë kemi fakte që PS me LSI bënë një marrëveshje të pistë për të hyrë në zgjedhje pa PD, duke shpërblyer LSI-në. Pra, LSI pranoi paktin me Edi Ramën për të hyrë në zgjedhje pa opozitën, pasi mori prej PS-së përfitime konkrete. Ato janë, posti i presidentit të Republikës dhe një numër deputetësh të LSI, që janë ende në listat e PS-së dhe për të cilët nuk flet askush. Në listat e PS-së së Tiranës dhe disa qarqe të tjera, ka deputetë të Ilir Metës, të cilët u vunë si garanci për të qenë një pritë, që Partia Socialiste të mos merrte më shumë deputetë se ç’duhej, meqë do hyhej pa PD në zgjedhje.
Një parti që e pranon këtë marrëveshje, që merr presidentin dhe fut këta deputetë në lista, nuk mund të marrë më flamurin e mbrojtjes së opozitës në këtë histori. Ajo thjesht nuk ua hodhi dot të dy palëve. Pasi garantoi këto vende nga Partia Socialiste, pasi mori presidentin dhe futi njerëz në lista, LSI donte të rrethonte politikisht Edi Ramën, duke u bërë bashkë me gjithë të tjerët kundër tij. Këtë gjë e zhbëri marrëveshja Rama-Basha, e cila për çudi quhet imorale. Në fakt ajo është një marrëveshje që i dha fund imoralitetit të marrëveshjes së pistë PS-LSI.
Tani, pasi ka bërë një fushatë të egër kundër Partisë Socialiste dhe Edi Ramës, pasi ka konsumuar çdo kërcënim kundër procesit, LSI në thirrjet e saj të fundit përsëri po shkon rreth PS-së. Fjala vjen, disa deputetë në Qarqet e Jugut po hapin fjalë se pas zgjedhjeve, ata do ikin me Edi Ramën, pasi kështu kanë shanse të marrin ndonjë votë të lëkundur. Vetë krerët e LSI-së po flasin për një aleancë të mundshme me PS. Në shumë detaje, përmbajtja e thirrjes së fundit, është sërisht PS.
Partia tjetër me më shumë shanse nga partitë e vogla, PDIU, po ashtu e ka orientuar thirrjen e saj të fundit tek aleanca me PS. Shpëtim Idrizi, Aqif Rakipi dhe kandidatë të tjerë të saj, e kanë bërë të qartë se mandatet e tyre do t’i bashkohen partisë së parë, për të cilën nuk e vë njeri në diskutim që janë socialistët.
SFIDA dhe LIBRA, dy parti që po luftojnë për elektoratin gri, kryesisht në Tiranë, janë të painteresuara për këtë trend, pasi ato kërkojnë votues që nuk duan pushtet, por oponencë, dhe si të tillë nuk janë të interesuara të flasin me kë do të jenë.
Por në tërësinë e saj, ajo që po e dominon thirrjen e fundit, apo trukun e ditëve të fundit në këtë fushatë, qoftë në tavolina, qoftë në fushatën “vesh më vesh”, qoftë në tribuna, është sekreti se ekziston një plan të bëhen me PS. Ajo që quhet “thirrje e fundit” për secilin, është “sekreti” se ata kanë shanse të bëhen me PS. Dhe kjo në fakt i jep fund debatit për fituesin, dhe lë të hapur vetëm kuriozitetin për bashkëfituesit.
