Policia ka vënë në pranga Gleard Gushollin, pasi u kap duke shpërndarë drogë, ndërkohë që ishte me masë sigurie arrest në shtëpi.
Gleard Gusholli është një emër jo pak i dëgjuar. Një vit më parë, ai u bë viral pasi mbajti peng në banesë, bashkëjetuesen e tij. Pasi e dhunoi për të paktën një javë rresht, e reja në atë kohë ia doli të njoftonte familjarët dhe blutë. Edhe pse i arrestuar për pengmarrje dhe dhunë në familje, Gusholli, në rrethana të paqarta, doli nga qelia në arrest shtëpiak. Dhe kjo nuk e pengoi aspak që të vijonte aktivitetin kriminal në shpërndarjen e lëndëve narkotike në kryeqytet.
Një natë më parë, nga ana e Komisariatit të Policisë nr.2 Tiranë, mbi bazën e të dhënave të grumbulluara në rrugë operative për kapjen e personave që shperndajnë lënde narkotike të llojit kokainë, u finalizua me sukses operacioni policor i koduar “Blloku 21”, ku u bë e mundur arrestimi në flagrancë i Gliard Gusholli dhe Frenkli Permarkaj.
Gjatë operacionit u sekuestruan në cilësinë e provës materiale: 4 qese me lëndë të dyshuar kokainë me peshë të përgjithshëm 23 gram, 2 aparate celularë, 1 automjet i tipit Mercedez Benz. Tashmë Gleard Gusholli duhet të përballet me ligjin edhe për dy vepra të tjera penale. Atë të “largimit nga banesa” apo thyerjen e arrestit shtëpiak dhe prodhimin dhe shitjen e lëndëve narkotike.
Njoftimi i policisë:
Tiranë/Vijojnë operacionet për goditjen e veprimtarive kriminale në fushën e narkotikëve.
Finalizohet nga Komisariati i Policisë Nr. 2, operacioni policor i koduar “Next”.
U kapën në flagrancë me 1 pako me lëndë narkotike kokainë, në automjet, të cilën dyshohet se e posedonin me qëllim shitjen në doza, vihen në pranga 2 shtetas. Njëri prej tyre kishte thyer masën e sigurisë “Arrest në shtëpi”.
Sekuestrohen sasia e kokainës, 2 aparate celular dhe 1 automjet.
Komisariati i Policisë Nr. 2, bazuar në informacionet e siguruara në rrugë operative, për një rast të shitjes së drogave të forta, në doza, ka organizuar dhe finalizuar operacionin policor të koduar “Next”, si rezultat i të cilit u vunë në pranga shtetasit:
G. G., 35 vjeç dhe F. P., 24 vjeç, të dy banues në Tiranë.
Në rrugën “Naim Frashëri”, shërbimet e Policisë kanë ndaluar automjetin me drejtues shtetasin G. G. dhe pasagjer shtetasin F. P. Gjatë kontrollit të automjetit u gjet një pako me lëndë të dyshuar narkotike kokainë (me peshë 24 gramë), të cilën dyshohet se këta shtetas e posedonin me qëllim shitjen në doza.
Nga verifikimet e kryera për rastin rezultoi se shtetasi G. G. kishte thyer masën e sigurisë “Arrest në shtëpi”, caktuar nga Gjykata, për veprën penale “Dhuna në familje”.
Materialet procedurale i kaluan Prokurorisë, për veprime të mëtejshme.
