Thesari që fsheh Laguna Patokut
Laguna e Patokut për një kohë të gjatë ka qenë “mollë sherri” mes familjeve Prenga e Cukali, lidhur me pronësinë mbi këtë lagunë. Por cila është historia e kësaj lagune?
Laguna e Patokut shtrihet përgjatë bregut shqiptar te Adriatikut. Ajo përfaqëson një nga bukuritë natyrore me interesante të këtij bregu. I ndodhur ndërmjet Lumit Mat në Veri dhe Lumit Ishem në Jug, ky kompleks përfshin një llojshmëri te larte habitatesh: laguna e brendshme dhe e jashtme (480 ha), pylli (200ha), tokat bujqësore (450ha) dhe blegtorale (150ha). Kjo është ajo çfarë ka mbetur nga një zone e mëparshme prej 4200 ha që ka kaluar një proces interesant zhvillimi, për shkak të faktorëve natyrore dhe aktiviteteve njerëzore.
Procesi natyror i zhvillimit të lagunës i detyrohet 3 faktorëve kryesorë: regjimit të Lumit Ishëm, regjimit të Lumit Mat dhe rrëgjimit talasografik. Gjatë gjysmës së dytë të shekullit të kaluar, aktivitetet njerëzore kanë luajtur një rol të rëndësishëm në ndryshimet e këtij ekosistemi nëpërmjet drenazhimeve, ndërtimit te digave, shpyllëzimeve etj. Iktiofauna përbën një nga vlerat më të çmuara të lagunës, më shumë lloje peshqish me interes ekonomik, siç janë qefujt, ngjala, barbuni, gjuhëza, koca, levreku etj.
