Parlamenti i Rumanisë rrëzoi të mërkurën kandidaturën e Siegfried Mureșan për formimin e qeverisë, duke thelluar krizën politike që nisi në muajin maj pas shpërbërjes së koalicionit qeverisës, raporton Politico.
Presidenti rumun Nicușor Dan, i zgjedhur si i pavarur dhe me profil të moderuar, kishte propozuar eurodeputetin Mureșan për postin e kryeministrit, por kandidatura e tij nuk arriti të siguronte mbështetjen e nevojshme në parlament.
Ky është rasti i dytë që parlamenti rrëzon zyrtarisht një kandidat të propozuar nga presidenti. Sipas Kushtetutës rumune, një situatë e tillë hap mundësinë për shpërndarjen e parlamentit dhe zhvillimin e zgjedhjeve të parakohshme.
Megjithatë, sipas Politico, presidenti Dan nuk dëshiron të çojë vendin drejt një procesi të ri zgjedhor, pasi një votim i parakohshëm mund të favorizojë partinë e djathtë radikale Aleanca për Bashkimin e Rumunëve (AUR), e cila aktualisht kryeson në sondazhe.
Për këtë arsye, presidenti po u kërkon forcave politike të kapërcejnë përplasjet dhe të arrijnë një marrëveshje për krijimin e një koalicioni të ri qeverisës.
“Politikanët duhet të shohin drejt njerëzve që u kanë dhënë mandatin”, deklaroi Dan gjatë një vizite në Republikën Çeke, përpara votimit në parlament. Sipas tij, fakti që një shumicë e madhe e rumunëve kërkon përfundimin e krizës mund t’i shtyjë partitë drejt një kompromisi.
Kriza politike në Rumani vijon prej muajit maj, ndërsa dështimi i dytë për formimin e një qeverie rrit presionin mbi partitë parlamentare për të gjetur një marrëveshje dhe për të shmangur zgjedhjet e parakohshme.
