Prokuroria në kuadër të hetimeve për dosjen “CEZ” ka thirrur edhe ish-ministrin Genc Ruli i cili do të pyetet për lidhjet e tij në këtë çështje.
Ish-ministri në qeverinë “Berisha”, do të pyetet si person që ka dijeni për privatizimin e CEZ.
Thirrja për tu pyetur e Rulit vjen pas vendimit të Gjykatës së Tiranës. Gjykata i la detyrë prokurorisë të marrë në pyetje disa emra, mes tyre edhe djali i ish-kryeministrit, Shkëlzen Berisha.
Vetë ish-ministri e ka konfirmuar lajmin dhe ka thënë se do të paraqitet në Prokurori dhe se po pret konfirmimin e orarit.
“Do jap sqarimet për çështjen në fjalë”, tha Ruli.
Ai ka qenë Ministër i Ekonomisë Tregtisë dhe Energjetikës nga viti 2005 deri në vitin 2009.
Privatizimi OSSH nga CEZ i kushtoi shtetit shqiptarë miliona Euro.
Një komision parlamentar hetoi çështjen dhe ia dërgoi prokurorisë por kjo e fundit e mbylli ndërsa gjykata e Tiranës pak ditë më parë urdhëroi hapjen e çështjes përsëri duke i lënë detyra prokurorisë se kush duhet të merret në pyetje.
a.ç
