Banka Botërore ka autorizuar Korporatën Elektroenergjetike Shqiptare të përdorë fondin 23 milionë euro për të blerë energji nga importi. Menjëherë pas autorizimit, KESH hapi zyrtarisht tenderin, duke i bërë thirrje kompanive private të paraqesin ofertat.
Sipas kërkesës zyrtare, Korporata kërkon të blejë 126 milionë kilovatorë energji për periudhën nga 1 deri më 30 shtator. Kjo përbën vetëm një pjesë të importit, që nevojitet për të plotësuar konsumin total. Sipas burimeve nga Operatori i Shpërndarjes, edhe për muajin tetor nevojitet një sasi importi thuajse e barabarte më atë që u ble në gusht, pra rreth 400 mijë megavat.
Rrjedhimisht, pjesa tjetër do të blihet nga vetë OSHEE.
Pra, në shtator nuk do të jetë vetem Operatori i Sistemit të Shpërndarjes së Energjisë që do të sigurojë furnizimin me energji të vendit nga jashtë. Stafeta këtë herë duket se i ka kaluar Korporatës Elektroenergjitë Shqiptare, e cila ka çelur procedurat për shprehje interesi nga palët që duan të marrin pjesë. Kredia e Bankës Botërore prej kohësh ishte në negocim për t’u përdorur në rast të një situate problematike hidrike në vend, por sasia e kredisë nuk do të përdoret e gjitha menjëherë.
Kompanitë e interesuara duhet që të ofertojnë pranë KESH dhe ofertat e tyre duhet të jenë të vlefshme deri në datë 28 gusht ndërkohë që lëvrimi do të bëhet në 1-30 shtator.
Në dy muajt e fundit, korrik dhe gusht, Shqipëria ka importuar mbi 50 milionë euro energji elektrike për të përballuar rënien e prodhimit vendas, si pasojë e thatësirës. Deri tani, e gjithë fatura është përballuar nga vetë fondet e OSHEE-së.
Në vitin 2014, kur nisi programi i rimëkëmbjes së sektorit të energjisë, qeveria nënshkroi një kredi rreth 150 milionë dollarë me Bankën Botërore për të financuar reformën. Pjesë e paketës ishte edhe një kredi rreth 23 milionë eurosh për të blerë energji, në rast situate të jashtëzakonshme, nëse, për shkak të rënies së prodhimit vendas, KESH nuk do të përmbushte dot detyrimin për furnizmin e OSHEE-së në masën e caktuar nga Enti Rregullator.
Nga rezultatet e tenderëve të fundit, shifra e importeve është rrumbullakosur për korrikun në 22 milionë euro dhe për gushtin në 30 milionë euro. Nëse çmimet do të rezultojnë të larta kredia e Bankës Botërore mund të jetë e pamjaftueshme. Në çdo rast, gjasat janë që edhe OSHEE vetë të tenderojë një pjesë energjie në ditët në vijim, ndërkohë që mbetet e paqartë nëse KESH do të vijojë të përpunojë vetëm prurjet e lumit Drin, sikurse po ndodh deri tani, apo do ta ndalë prodhimin për të krijuar rezervë hidrike, duke shfrytëzuar vetëm importin.
Të dhënat e pak ditëve më parë tregonin se Fierza kishte zbritur në nivelin e 268.13 metrave, ndërkohë që kishim një përmirësim të prurjeve në 50 metra kub/sekondë.
Temperaturat e larta dhe mungesa e reshjeve krijuan një situatë problematike në sektorin e energjisë, duke detyruar qeverinë të bënte dy lëvizje të befta në vetëm dy muaj.
Fillimisht ishte një vendim për përdorimin e kredisë së Bankës Botërore për blerje energjie, që u kthye në një “luftë” brenda kabinetit mes teknikëve dhe politikëve, por që, në fund, edhe pas miratimit, nuk mori bekimin e shpejtë të Bankës.
Së dyti, vetëm pak ditë më pare, qeveria do të ndryshonte buxhetin, duke rritur kufirin e huamarrjes për energjinë me 3 miliardë lekë, si një lëvizje për të garantuar furnizim, në kushtet kur operatorët e sektorit kanë financa të rrudhura nga kreditë dhe importet e mëparshme.
ma.me
