Hashim Thaçi ka akuzuar opozitën në Kosovë se dëshiron të marrë pushtetin me dhunë, por një gjë e tillë nuk do të lejohet të ndodhë. Ish-kryeministri e ka bërë deklaratën një intervistë me Top Channel.
“Përdorimi i gazit lotsjellës në Kuvendin e Kosovës është një veprim i shëmtuar, irritues dhe neveritës prej udhëheqësve opozitarë. Pushteti nuk fitohet me gaz lotsjellës, as me thika dhe shufra metalike, e as me njerëz të armatosur në Kuvendin e Kosovës. Nuk do të lejojmë që të përsëriten rastet e këqija të vendeve tjera të rajonit. Prandaj, mesazhi im është për unitet mes të gjithë qytetarëve të vendit”, tha zëvendëskryeministri dhe ministri i jashtëm i Kosovës.
Thaçi tha se ngjarjet e fundit në Kuvend nuk do të ndikojnë as në marrëdhëniet brenda koalicionit e as në përshpejtimin e zgjedhjeve parlamentare.
“Mund të konfirmoj se nuk do të ketë as zgjerim të koalicionit, as qeveri teknike, as zgjedhje të parakohshme. Por do të ketë funksionim të instutucioneve në kuptimin normal. Zgjedhjet e ardhshme do të jenë në qershor të vitit 2018. Udhëheqësit opozitarë duhet të kenë durim dhe të përgatiten për ato zgjedhje”, deklaroi Thaçi.
