Presidenti i Kosovës, Hashim Thaçi, ka reaguar për kohën, dy dekada më parë, kur Millosheviç u dorëzua para Nato-s.
Përmes një postimi në rrjetin social “Facebook” Thaçi ka shkruar, se në këtë ditë populli i Kososvës e kujton çdo dëshmor të rënë për ta bërë realitet pavarësinë.
“Në këtë ditë, 20 vjet më parë, Millosheviçi dhe ushtria e tij u dorëzuan para NATO-s. Marrëveshja e Kumanovës do të thotë çlirim, fund i gjenocidit, paqe dhe fillim i jetës së re në liri dhe barazi për ne. Ishte një rrugëtim i dhimbshëm, por krenar për rindërtimin e vendit dhe shoqërisë sonë. Për botën ishte një fitore e të drejtave të njeriut mbi çdo cenim në shekujt e mëparshëm”, shkruan Thaçi.
Presidenti thotë se dëshmorëve i është mirënjohës përjetësisht.
“Me respektin më të madh e kujtojmë çdo sakrificë të çdo kombi që iu bashkua NATO-s në këtë luftë të drejtë. Me dhimbje, por gjithmonë duke u krenuar me heroizmin e tyre, e kujtojmë edhe çdo dëshmor që ka rënë për të bërë realitet ëndrrën tonë. U jemi përjetësisht mirënjohës”, ka përfunduar ai.
g.kosovari
