Thaçi gafaxhi dhe injorant në sport
Zëvendëskryeministri dhe ministri i Punëve të Jashtme, Hashim Thaçi në dy postime në rrjetin social “Facebook” ka treguar se është injorant në sport. Ai ka përshëndetur pjesëmarrjen e Rita Zeqirit në Botërorin e notit në Kazan të Rusisë, raporton Koha.net.
Notarja kosovare, Rita Zeqiri, është renditur vetëm e 59-ta, të premten, në disiplinën 50 metra delfin në not, në botërorin e sporteve në ujë që po mbahet në Kazan të Rusisë. Zeqiri, e lindur në vitin 1995, pati kohë prej 32.12 sekondash. Koha e saj ishte 6.69 sekonda më e dobët se koha e arritur më e mirë në kualifikime. Zeqiri la prapa vetes vetëm pesë notare, ndër të tjera edhe 10-vjeçaren Alzain Tareq. Para botërorit koha më e mirë e Zeqirit në 50 metra delfin ishte 32.72 sekonda. Në Kazan ajo vendosi rekord të Kosovës.
Zëvendëskryeministri në postimin e tij të parë, e bëri fituese të medaljes së artë, Zeqirin, që u rendit e 59-ta ndërsa në postimin e dytë, ai e cilëson si “sensacion” fitimin e 50 metrave në këtë garë, që nuk i ndihmoi asgjë Zeqirit për kualifikime.
