Presidenti i Kosovës, Hashim Thaçi, ka deklaruar se gjatë vizitës që do ta ketë në Malin e Zi nuk do të flitet për tema të veçanta.
Kurse, sa i përket Demarkacionit me Malin e Zi, ai tha se ajo çështje është përmbyllur në komisionet e përbashkëta. Sipas Thaçit, forcimi i shtetit tonë kalon përmes përcaktimit të qartë të kufijve dhe demarkacioni është në shërbim të kësaj.
“Është një vizitë apo pjesëmarrje në ceremoninë e 10 vjetorit të pavarësisë së Malit të Zi, ku marrin pjesë edhe president të vendeve të rajonit, vendeve evropiane, por edhe përfaqësues të vendeve të SHBA-ve. Është një vizitë e respektit por edhe e takimeve bilaterale që mund të ndodhin, por nuk është një vizitë që do të ketë tryezë të veçanta diskutimi, çështje të veçantë.
Çështja e demarkacionit është e përmbyllur në komisionet e përbashkëta. Unë jam president i vendit, mbështes procedurën e Kuvendit të Republikës së Kosovës, dhe vendimet e mazhorancës.
Besoj që konsolidimi dhe forcimi i shtetit tonë kalon përmes përcaktimit të qartë të kufijve dhe mendoj që demarkacioni është në shërbim të kësaj dhe gjithë spektrit politik do të jetë unik në këtë veprim”, tha ai, referoi për Koha. (b.an)
