Replikat ndërmjet zëvendëskryeministrit të Kosovës, Hashim Thaçi, dhe Ministrit të Punëve të Jashtme të Serbisë, Ivica Daçiç janë zhvendosur në mbledhjen e OKB-së. Në fjalën e tij Thaçi i është drejtuar Daçiç se ai mund të aplikojë lirisht për marrjen e dokumentacionit të Kosovës.
“Kosova e lejon dyshtetësisë”, ka thënë Thaçi.
Kjo ofertë e tij erdhi pasi Daçiç tha se ai kishte lindur në Prizren, dhe se tashmë serbët janë dëbuar nga ai vend.
“Objektet e trashëgimisë kulturore janë më sigurta tani se sa gjatë 1000 vjetëve të shkuara. Kishat ortodokse serbe ruhen nga Polica e Kosovës”, tha Thaçi dhe shtoi se “lufta ne Kosovë nuk ka qenë luftë fetare. Ka qenë luftë që e ka filluar Serbia, ashtu siç e ka nisur luftën edhe me Kroacinë e me Bosnjën”.
Ai ftoi anëtarë e KS që të mbështesin kërkesën e Kosovës për anëtarësim në UNESCO.
Thaçi e akuzoi Daçiç për fjalorin e ashpër të përdorur, ndërsa shtoi: “Daçiqi ka lindur në Kosovë dhe unë i kam ofruar atij të marrë pasaportën e Kosovës. Por, Daçiç nuk ka treguar se të parët e tij erdhën si kolonizues ndërmjet dy luftërave në Kosovë”.
Thaçi ftoi vendet e BE-së që të mos e vonojnë nënshkrimin e MSA-së me Kosovën dhe liberalzimin e vizave për qytetarët e saj. Ndërsa, shfaqi keqardhje pse mekanizmat ndërkombëtarë nuk kanë dënuar dhunimin e më shumë se 20 mijë grave nga Ushtria e Policia e Serbisë.
Gjithashtu, Thaçi i tha homologut të tij serb: “Ju do të vazhdoni luftën se e keni zakon, por prapë do ta humbisni”.
