Enver Hoxha, ish-diktatori i regjimit komunist në Shqipëri ka qenë një “burrë shteti”, ndërsa të gjitha të tjerat që janë thënë dhe shkruar për të janë vetëm “paçavure”.
Është Teuta Hoxha, nusja e djalit të madh të Enverit, Ilir Hoxhës, e cila në një intervistë për Gazetën Shqiptarer ka vendosur të hapë dyert përmes librit që do të jetë pas pak ditësh nëpër librari, “Enveri në kujtimet e mia”.
Në fjalën e saj gjatë intervistës, Teuta Hoxha rrëfen përmbajtjen që do të ketë libri, i cili siç thekson ajo nuk është me përmbajtje politike, por vetëm përmes kujtimeve që ajo ka nga jetesa në familjen Hoxha.
Teuta Hoxha shprehet se ky libër mund të jetë nesër i vlefshëm edhe për ata që do të shkruajnë mbi figurën e Enverit, duke shtuar se gjatë kësaj kohe mjaft “paçavure” janë bërë në dëm të tij. Nusja e djalit të Enverit e cilëson ish-diktatorin si një burrë të vërtetë shteti.
“Edhe në rastin e Enver Hoxhës, për të plotësuar jetëshkrimin e tij në mënyrë objektive, pa shtrembërime dhe trillime, kërkohet qëmtimi dhe grumbullimi i atij mozaiku të pafund të dhënash, që kanë të bëjnë me tërë figurën e tij, me jetën dhe veprimtarinë e tij, në planin njerëzor, psikologjik, shoqëror e politik, pasi ai ka qenë dhe mbetet një burrë shteti, që drejtoi vendin për gati gjysmë shekulli. Nuk është një punë e lehtë, as punë gazetarësh, që, për interesat e tyre të ditës, botojnë paçavure, që vetëm ‘biografi’ nuk mund të quhen. Në ndihmë të historianëve dhe studiuesve vjen edhe kontributi i të gjithë atyre që kanë jetuar dhe punuar me Enver Hoxhën, i atyre që e kanë njohur nga afër dhe që kanë treguar me gojë ose me shkrim ato copëza dhe fakte nga jeta e udhëheqësit, që shërbejnë për të njohur, për të kuptuar dhe për të vizatuar më mirë dhe më saktë profilin e gjithanshëm të tij.” shprehet Teuta Hoxha.
Ajo ka treguar edhe momentin e takimit të parë me ish-diktatorin, ku tregon se pasi ishte vënë në dijeni nga Nexhmija për shoqen e djalit, Enveri kishte kurdisur takimin mes tyre nga dëshira për të njohur nusen e djalit të tij Ilirit.
“Ishte koha kur ne të dy akoma nuk i kishim vënë në dijeni prindërit tanë për lidhjen tonë. Iliri, që kishte një marrëdhënie shumë të afërt me Nexhmijen, ia kishte rrëfyer, por me kushtin që të mos i tregonte babait. Nexhmija, duke ditur që Enveri do të gëzohej shumë, e ‘shkeli’ fjalën dhe ia tregoi të shoqit. Atëherë Enveri ‘kurdisi’ takimin, që të njihte shoqen e zgjedhur të Ilirit. “ ka treguar ajo
Në fund ajo fton të gjithë që të lexojnë librin e saj që sjell figurën e Enver Hoxhës përmes kujtimeve të saj.
