Në kuadër të muajit të ndërgjegjësimit për kancerin e gjirit, presidenti i Republikës Bajram Begaj, ka shpërndarë një mesazh sensibilizues dhe mbështetës për të gjitha gratë dhe vajzat që po përballen me këtë sëmundje.
“Çdo histori është unike, çdo rrugëtim ka rëndësi,” thekson presidenti Begaj në postimin e tij publik.
Ai i ka inkurajuar gratë dhe vajzat që, me guxim të jashtëzakonshëm, luftojnë çdo ditë ndaj kancerit të gjirit, duke vlerësuar forcën, vendosmërinë dhe shpresën që ato përcjellin përmes përvojave të tyre personale.
Në mesazhin e tij, presidenti Begaj ka vënë theksin te rëndësia e parandalimit dhe diagnostikimit të hershëm, duke rikujtuar se kontrollet periodike shpëtojnë jetë.
“Në Muajin e Ndërgjegjësimit të Kancerit të Gjirit, inkurajojmë gratë dhe vajzat që me guxim të jashtëzakonshëm përballen me këtë sëmundje.
Parandalimi dhe diagnostikimi i hershëm shpëtojnë jetë.”, shkruan Begaj.
Muaji tetor, i njohur ndryshe si “Tetori rozë”, është kthyer në një periudhë globale ndërgjegjësimi për luftën kundër kancerit të gjirit, ku institucionet, organizatat dhe qytetarët ftohen të bashkohen në mbështetje të grave që janë prekur, si dhe të promovojnë kontrollet mjekësore të rregullta.
