Hapet portali “Mësues për Shqipërinë” për arsimtarët, të cilët kanë përfunduar fazën e parë të garës për një vend pune, konkurrimin me dosje. Ministria e Arsimit sqaron kandidatët se aplikimi në portal do të nisë pasnesër, ndërsa kandidatët e kualifikuar në fazën e parë do të kenë në dispozicion pesë ditë kalendarike për të kryer procedurën që i hap rrugë testimit të 21 janarit 2017.
Aplikimet do të qëndrojnë të hapura gjatë gjithë ditës, nga ora 08:00 deri në mesnatën e 16 dhjetorit. Por më parë, ata duhet të tërheqin pranë Drejtorive Arsimore Rajonale fletën e pranimit me qëllim aplikimin në portal. Ndonëse testimi do më shumë se një muaj të zhvillohet, gjatë kësaj kohe kandidatët mund të mësojnë falë programeve orientuese që tashmë janë publikuar në faqen zyrtare të Institutit të Zhvillimit të Arsimit dhe MAS.
APLIKIMI
Mësuesit në kërkim të një vendi pune mund të aplikojnë në rrugë elektronike në www.mesues.arsimi.gov.al nga data 11-16 dhjetor, kur edhe portali të jetë hapur. Aplikimi, i njëjtë me atë të dy viteve të kaluara, konsiston në plotësimin e një tabele me të dhënat personale dhe profesionale, ku përveç gjeneraliteteve, kërkohet niveli i shkollimit, universiteti, titulli i diplomës, mesatarja e studimeve, vitet e punës dhe shkalla e kualifikimit apo trajnimet e certifikimet që zotërojnë kandidatët.
Një pikë e rëndësishme është drejtoria arsimore ku ata dëshirojnë të punësohen, duke përzgjedhur e renditur tre prej vendeve ku do të dëshironin të punonin në rast se fitojnë. Po gjatë kësaj faze, përcaktohet edhe drejtoria ku do të jepet provimi dhe profili i testit që kërkohet. Në fund, shënohet një numër kontakti dhe adresa elektronike për t’u informuar me procedurat në vijim. Ekspertët e arsimit apelojnë për kujdes në fazën e aplikimit, pasi bëhet vetëm një herë e në rast se të dhënat konfirmohen, nuk mund të bëhen ndryshime.
PUNËSIMI
Pas përfundimit të testimit, dalin rezultatet në rend zbritës për çdo profil apo lëndë, në bazë të pikëve që kanë grumbulluar kandidatët. Rregulli është i njëjtë edhe këtë vit. Zgjedh i pari ai që ka më shumë pikë. “Kandidati, i cili në renditjen e përgjithshme sipas profilit/ lëndës është renditur me numrin më të madh të pikëve, ka të drejtën e zgjedhjes për vendet e lira të punës në institucionet arsimore në prezencë të Komisionit të ngritur pranë Drejtorive/Zyrave Arsimore Rajonale”, thuhet në njoftimin e MAS.
Rezultati i provimit është një nga faktorët përcaktues, por vendimtar për t’u punësuar. Pikët e testit kanë 70% të peshës në garën për punë, ndërsa dosja personale 30%. Një shumatore e të dyjave përbëjnë totalin e pikëve që bëjnë rankimin përfundimtar të mësuesve. Sipas Udhëzimit 38, në rast se hapet një vend pune për një profil të caktuar, kandidati me rezultate maksimale punësohet me kontratë 1-vjeçare që quhet provë. Probabiliteti i punësimit është në varësi të pikëve, por edhe të vendeve vakante që hapen në profilin që ata i përkasin.
ma.me
