Është vetëdorëzuar shtetasi Ronald Kryemadhi, i cili terrorizoi zonën e Kamzës pas goditjeve në ajër me armë zjarri. Pas më shumë se gjysmë ore negociata me policinë ai është vetëdorëzuar.
Më parë ky shtetas pasi ishte futur në banesën e tij, ka kërcënuar forcat e policisë duke iu drejtuar një armë zjarri pistoletë.
Kronologjia e ngjarjes:
Të shtëna me armë zjarri janë regjistruar mesditën e sotme në Kamëz. Shërbimet e Komisariatit të Policisë Nr. 5 kanë shkuar në banesën e shtetasit Ronald Kryemadhi, për ta shoqëruar në Gjykatë, në zbatim të kërkesës së saj, për shoqërim të detyrueshëm të tij.
Por në momentin që shërbimet e Policisë kanë hyrë në banesë ky shtetas ka nxjerrë një armë zjarri pistoletë dhe ka kanosur punonjësit e Policisë për vrasje në rast se do afroheshin dhe më pas është mbyllur në banesë.
Menjëherë në ndihmë të Policisë lokale kanë shkuar forcat e DVP Tiranë, FNSH dhe RENEA dhe është bërë rrethimi i banesës, vendosja e perimetrit të sigurisë, evakuimi i banorëve dhe ndalimi i qarkullimit në perimetrin e sigurisë.
Pas negociatave të bëra nga Forcat Speciale RENEA me autorin, për t’u dorëzuar, ku i fundit pas gjysmë ore është vetëdorëzuar, në pamundësi për t’u larguar nga banesa.
Personi është shoqëruar në ambientet e Komisariatit të Policisë Nr. 5, për veprimeve të mëtejshme.
Grupi hetimor vijon kontrollin në banesë, për gjetjen dhe sekuestrimin e armës së zjarrit.
/e.rr
