Ambasada e Rusisë në Tiranë ka reaguar pas lajmeve se gjatë operacionit të ndërmarrë më 30 shtator 2015 nga Forcat Ushtarake Ajrore ruse në Siri kundër Shtetit Islamik janë vrarë njerëz të pafajshëm.
Ambasada ruse deklaron se Forcat Ajrore ruse kanë goditur me përpikmëri objektet e Shtetit Islamik, dhe se nuk ka vrarë civilë.
“Forcat Ajrore të Rusisë filluan operacionin e sulmeve mbi pozicionet e grupimit terrorist Shteti Islamik (ISIS) në Siri të mërkurën, më 30 shtator 2015, pasi
Këshilli Federal (dhoma e lartë e parlamentit rus) i dha miratimin presidentit të Rusisë për të përdorur Forcat e Armatosura të Federatës Ruse jashtë territorit të
vendit. Më herët, presidenti i Sirisë Bashar Asad, i cili aktualisht po lufton kundër terroristëve të ISIS, dërgoi në Moskë një kërkesë zyrtare për t’i dhënë ndihmë
ushtarake vendit të tij. Kështu, sipas legjislacionit të Rusisë dhe të drejtës ndërkombëtare, prania dhe veprimet e Rusisë në Siri janë absolutisht legjitime. Forcat
Ajrore ruse filluan të godasin me përpikmëri objektet e Shtetit Islamik, pasi kishin kryer zbulime nga ajri dhe kishin vërtetuar të dhënat që ishin vënë në
dispozicion nga shtabi i ushtrisë siriane. Në dy ditët e para të operacionit ushtarak avionët rusë kryen me shume se 28 fluturime dhe goditën 17 objekte të Shtetit
Islamik”, thuhet në reagimin e ambasadës ruse.
Menjëherë pas reagimit të ambasadës ruse është kundërpërgjigjur ambasada e SHBA përmes një deklarate në emër të koalicionit.
SHBA, Franca, Gjermania, Katari dhe Arabia Saudite përmes një deklarate të përbashkët kanë reaguar për sulmet sulmet e ndërmarra nga Forcat Ajrore Ruse në Hama, Homs dhe Idlib, të cilat morën jetë njerëzish të pafajshëm dhe nuk vunë në shënjestër ISIS.
“Ne, qeveritë e Francës, Gjermanisë, Katarit, Arabisë Saudite, Turqisë, Mbretërisë së Bashkuar dhe Shteteve të Bashkuara të Amerikës, deklarojmë sa më poshtë në lidhje me sulmet e fundit ushtarake të Federatës Ruse në Siri:
Ne shprehim shqetësimin tonë më të thellë në lidhje me përforcimet e trupave ushtarake ruse në Siri, dhe në veçanti, sulmet e ndërmarra nga Forcat Ajrore Ruse në Hama, Homs dhe Idlib, të cilat morën jetë njerëzish të pafajshëm dhe nuk vunë në shënjestër ISIS.
Këto veprime ushtarake sjellin përkeqësim të mëtejshëm dhe do të nxisin akoma më shumë ekstremizëm dhe radikalizim.
Ne i bëjmë thirrje Federatës Ruse që të ndalojë menjëherë sulmet e saj mbi opozitën siriane dhe popullsinë civile, dhe të përqëndrojë përpjekjet e saj në luftën ndaj ISIS’thuhet në deklaratën e Përbashkët të SHBA mbi Sulmet e Fundit Ushtarake të Federatës Ruse në Siri.
