Kryeministri Edi Rama ka mbledhur sot për të tetën herë kabinetin qeveritar në një mbledhje të jashtëzakonshme, pas tërmetit shkatërrimtar që goditi vendin më 26 nëntor.
Teksa bënte një bilanc të situatës në vend, kreu i qeverisë tha se në total, në këtë strukturë emergjence janë 12366 persona. Deri më tani sipas Ramës, 12 mijë e 366 persona janë të strehuar në çadra e hotele. Po ashtu kreu i qeverisë tha se policia dhe prokuroria po hetojnë në lidhje me dokumentimin dhe vënine para përgjegjësisë të përgjegjësve që qëndrojnë pas godinave të shembura. Kreu i qeverisë tha se duhet të vijojë puna pa pushim për shembjen e të gjitha banesave të dëmtuar rëndë.
“Situata paraqitet më pozitive në raport me nevojat imediate, përmirësohet cdo ditë natyrshëm. Sot kemi 22 persona që vijojnë që të marrin shërbim në spital, nga të cilat 16 në Tiranë, 3 në Durrës dhe 3 jashtë vendit. Gjendja e atyre që po kurohen në Shqipëri është stabël dhe gatishmëria për të spostuar këdo është e plotë. Ministria ka siguruar që në moment që mund të duhet një transferim jashtë kjo të ndodhë pa asnjë vonesë.
Përsa i përket strehimit sot kemi kapërcyer numrin e 4 mijë personave në hotele, 254 janë në palestra dhe shifra e përafërt e atyre që janë në cadra, por këtu vijon puna për të garantuar cadra dimërore me standarde. Kemi 6323 persona, 395 persona në qendra shëndetësore dhe 783 persona në Kosovë. Besa dhe Ogerta do të kërkoja të shkonin në kampin në Kosovë për të bërë një vizitë dhe për t’u ofruar që të kthehen dhe të akomodohen në hotele. Ka edhe një grup 436 persona të regjistruar në strehtë të ndryshme. Sot në total janë 12366 persona në këtë strukturë emergjence” tha ai.
g.kosovari
