Një ditë pas tërmetit që përfshiu jugun e vendit, ku epiqendra ishte Ura-Vajgurore, dalin bilancet e dëmeve të shkaktuara.
Në këtë qytet, por dhe në Kuçovë ka pasur dëmtime në disa banesa. Kështu në Urë-Vajgurore janë dëmtuar 3 banesa në fshatin Konisbalt, ndërsa në fshatin Allambres të Kuçovës raportohet për 2 shtëpi të prekura.
Sakaq, bilanci i rënd vjen nga fshati Magjatë, pasi lëkundjet kanë shkaktuar dëme në 6 banesa, ndërsa në Luman janë dëmtuar 2. Po ashtu, shumë banesa në mbarë qarkun e Beratit kanë pësuar plasaritje. Lidhur me këtë fakt, prefekti i Beratit, Fadil Nasufi pohoi se do të merren të gjitha masat për dëmshpërblimin e banorëve të prekur nga tërmeti raporton BW. Dje rreth orës 17:07, disa qytete të Shqipërisë u goditën nga një tërmet me magnitudë 4.8 ballë.
Sipas Institutit të Gjeoshkencave, Energjisë, Ujit dhe Mjedisit (IGJEUM), tërmeti u ndje në Vlorë, Fier, dhe Berat, ndërsa epiqendra ka qenë 7 kilometra nga Ura Vajgurore, 15 kilometra nga qyteti i Beratit dhe 61 kilometra nga Tirana. Tërmeti ka qenë me një thellësi 3 kilometra dhe për pasojë lëkundjet kanë qenë të forta. Tërmeti shkaktoi panik tek qytetaret të cilët lanë banesat e tyre, apo vendet ku ishin, duke dalë në rrugë./a.m.
