Trupi i Erjon Toros, viktimës shqiptare në tërmetin që goditi më 24 gusht Italinë qendrore, do të niset sonte në mbrëmje nga Italia drejt Shqipërisë.
Nga provinca e Rietit ku ndodhet aktualisht trupi i pajetë i Erjon Toros, do të udhëtojë drejt portit të Brindisit e më pas me një traget linje do të mbërrijë në Shqipëri.
Parashikohet se në mëngjesin e së dielës trupi i pajetë i Erjon Toros do të jetë në portin e Vlorës raporton Express.
Ambasada shqiptare në Romë ka përgatitur të gjithë dokumentacionin e duhur për të riatdhesuar trupin e të ndjerit.
Bashkëshortja e Erjon Toros, Elsa Toro, vazhdon të jetë e shtruar në spitalin e Aquilas.
Gjendja e saj shëndetësore është e qëndrueshme dhe vazhdon të jetë nën një mbikëqyrje speciale të mjekëve.
Ndërsa 2 nga 5 shtetaset shqiptare të plagosura nga ky tërmet kanë dalë nga spitali “Gemelli” i Romës.
Gjendja shëndetësore e 3 shqiptareve të tjera të shtruara në këtë strukturë është drejt përmirësimit./a.m.
