Keti Bashhysa ishte dje e ftuar në emisionin “Ftesë në 5” , ku përvec pjesës profesionale, bëri dhe disa rrëfime të dhimbshme lidhur me përjetimin e tërmetit shkatërrimtar të 26 nëntorit.
Aktorja jo vetëm u prek psikologjikisht nga fatkeqësia natyrore, por humbi dhe shtëpinë që kishte paguar me të gjitha kursimet e mbledhura me aq shumë mund.
Atë banesë e kishte marrë prej vetëm 3 muajsh.
“Unë kam përjetuar një gjë shumë të tmerrshme. I lutesha Zotit, e dija që do vdisja, por lutesha mos më dhembi shumë, mos ta ndjeja.
Ishte e tmerrshme, shtëpia është shkatërruar, është e pabanueshme. Shpresat janë të pakta, për të mos thënë fare..
Kisha tre muaj që isha futur. E doja shumë shtëpinë, sic do njeri, prisja me padurim të mblidhja lekët që të blija diçka të re.
E admiroja atë shtëpi, por s’ishte e thënë”, tregoi Keti, duke shtuar se punimet kishin qenë skandaloze, ndërsa cmimi ishte paguar i plotë.
Aktorja është duke jetuar në një banesë me qira, ndërsa po bën përpjekje që të marrë nga institucionet përkatëse rimbursimin që i takon.
